Puntland “Madaxweyne Xasan Shiikh waan casunay wuuna aqbalay in uu noo yimaado”

[Deeq A.]

Xukuumadda Puntland ayaa markii u horraysay faahfaahin ka bixisay cidda ku casuman munaasabadda caleema-saarka madaxweyne Deni iyo ku xigeenkiisa Lugatoor.

Wasiirka Warfaafinta Puntland Maxamuud Caydiid Dirir oo ka warbixiyay arrintaasi ayaa sheegay in xafladda caleema-saarka ay ku casuman yihiin madaxweynaha dowladda Federaalka Soomaaliya iyo dhammaan madaxda maamul goboleedyada.

Wasiirka Warfaafinta Maxamuud Caydiid Dirir ayaa sheegay in madaxweynaha Soomaaliya oo lagu martiqaaday munaasabadda caleema-saarka uu aqbalay in uu yimaado, islamarkaana ay safarka ku wehelin doonaan mas’uuliyiin ka tirsan golayaasha dowladda Federaalka Soomaaliya.

“Madaxda Federaalka, madaxweynuhu waa ku casuman yahay caleema-saarka, waana uu aqbalay, maamul goboleedada dhammaantood waa la casumay, qof shaqadu u saamixi waydo oo hawl ka soo gasho mooyaane” ayuu yiri wasiir Caydiid.

Munaasabadda caleema-saarka oo sidoo kale ay ka qayb-galayaan siyaasiyiin madax-bannaan iyo wakiilada Beesha Caalamka ayaa lagu wadaa in ay qabsoonto Khamiista Todobaadkan oo ku beegan 25 Jan.

PUNTLAND POST

The post Puntland “Madaxweyne Xasan Shiikh waan casunay wuuna aqbalay in uu noo yimaado” appeared first on Puntland Post.