Waa maxay kharaska iyo shuruudaha lagaaga baahanyahay hadii aad guursanayso gabadh Marookan ah

[Deeq A.]

Waxaa baraha internetka ee Soomaalida qabsaday wararka iyo dooda la xiriirta ragga Soomaalida ah ee u safraya dalka Moroccoo si ay u guursadaan gabadho dalkaas u dhashay.

Soomaalida iyo guursiga ajnebiga mudadii dambe aad buu u kordhayay rag iyo dumar laakiin ragga Soomaalida ah ee guurka u aadaya Moroccoo waxay ku sababeeyeen in guurka gabdhaha dalkaas, oo Muslim ah, ka jaban yahay kan dumarka Soomaalida.

Ma ahan Soomaalida oo keliya, laakiin rag kala duwan oo ajaanib ah ayaa guur u aadaya dalkaas.

Laakiin ragga Soomaalida ah ee muuqalada iska-duubay iyaga oo Morocco safar u ah oo sheegaya inay halkaas guur ugu socdaan ayaa dood weyn oo xooggan islamarkaas na uu kaftan ku laran yahay ka dhex abuurtay dhalinyaradda Soomaalida ee Internetka.

Nin walba oo iska socda ma guursan karo gabadh Moroccoo u dhalatay si walba oo uu u doonayo. Waa in aad la timaado warqada dhalashada rasmiga ah ee ahayn kuwa aad ka qaadatay dalalka aad horey isaga dhiibtay ee sharciga ku siiyay.

Nin walba oo Soomaali ah oo doonaya in uu gabadh Morocco ah guursado, waa in uu marka hore caddeeyo Soomaalinimadiisa xitaa haddii uu heysto baasaboor Maryekan ah.

Waxaa kale oo lagaaga baahan karaa warqada dembi la’aanta in aad ka heshid oo ka keentid dalka aad ka timid ee aad ku nooleyd. Sidaa si la mid ah, waxaa la hubin doonaa in sifo sharci ah aad kusoo gashay dalka iyo in kale.

Tani waxay ka dhigan tahay in qof tahriib ama sharci daro ku galay uusan guursan karin gabadh u dhalatay Moroccoo.

Haddaba, dib uga istaag haddii ay kula ahayd in aad u tahriibto Moroccoo iyo gabadhaha ay ragga Soomaalida ah hadda ka daba-dhaceen. Waxaa sidoo kale muhiim ah in aad heysatid sharciga degenaashiyaha Moroccoo kahor guurka.

Warqada caafimaad-qabka
Mid kale oo ka mid ah sharuudaha muhiimka ah ee guurka ee Moroccoo waa hubinta caafimaadka lamaanaha is-guursanaya kahor meherkooga.

Si gaar ah, waxay sharuudaan u saameyneysaa ninka dibeda ka yimid ee soo doontay gabadha reer Moroccoo.

Waxaa baaraya dhakhtar dhashay Morocco ama mid ka howlgala xarumaha caafimaadka ee dalkaas.

Qorshaha guurka wuu fashilmayaa ama ugu yaraan dib uu u dhici karaa haddii baaritaanka caafimaad uu muujiyo dareen iyo shaki caafimaad qab, si gaar ah cuduradda ku faafa galmada.

Haddaba, hubi caafimaadkaaga kahor inta Aadan bixin sooryada, lacagta delaalka ama dhaqaale kale oo Aadan ka maarmi doonin.

Saxiixa iyo ogolaanshiyaha xaaskaaga kale ama Warqada Cadeynta Doobnimada

Kahor inta aanan laguu oggolaan in lagu siiyo gabadh ama laguu guuriyo haweeney u dhalatay Morooko, waa ninka qasab ku ah in uu cadeeyo in uu yahay doob ama in uu horey usoo guursaday, iyo in uu hadda xaas kale leeyahay.

Waxaa looga baahanayaa warqad cadeyneysa doobnimadiisa oo laga saxiixo safaarada dalkiisu ku leeyahay dalkaas.

Haddii uu horey usoo guursaday oo ay xaaskiisii hore kala tageen, ama ba ay geeriyootay waxaa looga baahan doonaa warqada cadeynta kala-taga ama warqada geerida oo ay tahay inay xaqiijiso safaarada dalkiisu ku leeyahay Morocco.

Haddii uu hadda xaas kale leeyahay, waxaa looga baahan yahay in uu keeno warqad saxiixan oo ay hubisay safaaradda oo ay xaaskiisu ku oggolaanayso in uu guursan karo gabadh kale.

Ma dhacayo meherka iyo arooska kahor inta ninka doontay gabadha uu ka buuxinayo sharuudahaas, oo laga hubinayo warqadaha.
Ma shaqeyste iyo sabool looma hayo gabadh
Waxaa kale oo muhiim ah in qofka doonaya gabada u dhalatay Moroccoo uu marka hore ba heysto shaqo lacag leh oo ku filnaan karta nolosha qoyska cusub ee uu dhisayo.

Waa in uu shaqadaas ka heystaa dalka uu ka yimid, islamarkaasna cadeyn karaa shaqadaas.

Ma dhacdo marwalba, laakiin waxaa suurtogal noqon karta in la weydiinayo warqado saxiixan ama xisaabta u taal bankiyada. Haddaba, qof walba kama doonan karo gabadh Moroccoo.

Mid shaqeyste iyo mid xooggiisa maalmaha oo keliya ayaa buuxin kara sharuudaha qaarkood.

Qiimaha ku bixi kara guurka Moroccoo
Waxaa baraha bulshada Soomaalida ku faafay in qiimaha guurka Moroccoo uu aa duga jaban yahay dhulka Soomaalida iyo meelaha kale ee dunida.

Waxay wararka faafay oo laga soo weriyay rag Soomaali ah oo gabdho ka doontay Moroccoo sheegayaan in qofku baahan yahay wax ka yar saddex si uu u doonto gabadh, u mehersado islamarkaas na u guri geysto.

Annaga oo og in marwalba qarashka ku baxa guur uu yahay hadda waxa ay ku heshiiyeen labada qof ee is-guursanaya ama hadba sida loo qorsheeyo, haddana waxaa hubinta ah in marwalba uusan guurka Moroccoo u jabneyn sida loogu dhexfaafiyay baraha internetka Soomaalida.

Ku tala-gal oo qoontey lacag ku dhow $20,000 oo doolar haddii uusan qarshahaaga uusan ahayn aroos gaagaabey ama wax u eg qudbosiro.

Waxaa lacag badan kaaga bixi kartaa warqada lagaaga baahan yahay iyo hubintooda, sida badan na, safaaradaha iyo xafiisyada kale ee ay khuseyso kuma qabtaan adeegyadaas lacag la’aan.

Mararka qaar meherka oo keliya ayay ku bixi kartaa lacag dhan $3,000 oo doolar.

Sidaa si la mid ah, waxaa muhiim ah in qofka doonaya in uu dego oo uu reer ka dhisto Moroccoo in uu ku talogalo caqabadaha afka. Carabig iyo Faransiis ayaa ah labada af ee looga hadlo dalkaas. Qofwalba oo reer dejinaya waa muhiim.

Bbcsomali

Qaran News