DEG DEG: DF oo dalab xasaasi ah oo deg degga, kana dhan ah damacii Abiy u dirtay…

[Deeq A.]

Muqdisho (Caasimada Online) – Dowladda federaalka Soomaaliya ayaa dalab deg-deg ah oo ka dhan ah heshiiskii Muuse Biixi iyo Abiy Ahmed ku gaareen Addis Ababa u dirtay Ururka Jaamacada Carabta.

Dowladda Soomaaliya ayaa waxay ka dalbatay inay shir deg deg ah isugu yimaadaan Wasiirada Arrimaha Dibadda Jaamacadda Carabta.

Safiirka Soomaaliya ee Masar ahna Wakiilka Joogtadda ah ee Ururka Jaamacadda Carabta Danjire Ilyaas Sheikh Cumar ayaa shaaca ka qaaday in Soomaaliya ay Ururka Jaamacadda Carabta u gudbisay codsigaan.

Dalabka Soomaaliya ayaa ku qotoma in la qabto shir deg-deg ah oo ay isugu imaanayaan Golaha Wasiiradda Arrimaha Dibadda ee Carabta.

Ujeedka ayay ku sheegtay “si ay uga wada-hadlaan cawaaqibka ka dhalan kara in si sharci-darro ah loo dhammeeyo heshiiska is-afgaradka ah ee ay kala saxiixdeen Itoobiya iyo maamul goboleedka Somaliland.”

Ururka Jaamacadda ayaa looga baahan yahay in arrintaan laga qaato mowqif midaysan oo Carbeed lagana jawaabo xad-gudubka cad ee ay Itoobiya ku hayso madax-banaanida iyo wada-jirka dhuleed ee Jamhuuriyadda Federaalka Soomaaliya.

Horey Baarlamaanka Jamaacadda Carabta ayaa bayaan culus ka soo saaray xad-gudubka Itoobiya ayaa lagu diiday damaca ra’iisul wasaare Abiy Axmed ee ku aadan badda Soomaaliya, kaasi oo dhalisay xiisad xoogan.

Baarlamaanka ayaa ku baaqay in la ilaaliyo wada-jirka iyo midnimada dhuleed ee Jamhuuriyadda Soomaaliya, iyada oo sidoo kale la ixtiraamayo daris wanaagga.

“Dowladda Itoobiya waa inay dhowrto shuruucda caalamiga ah, kuna dhaqanto wada nooshaha daris wanaagga,” ayaa lagu yiri bayaanka kasoo baxay Baarlamaanka Jaamacadda Carabta.

Sidoo kale, Ururka Iskaashiga Islaamka ee OIC ayaa bayaan uu soo saaray ku caddeeyay sida ay u diidan yihiin is-afgaradkii dhex-maray maamulka  Somaliland yo Itoobiya, kaasi oo ay ka carootay dowladda federaalka Soomaaliya.

“Waxaa naga go’an ixtiraamka madax-bannaanida iyo wadajirka dhuleed ee dowladaha xubinta ka ah OIC  si waafaqsan Axdiga Ururka Iskaashiga Islaamka iyo sharciga caalamiga ah, kadib heshiiska is fahamka ee u dhexeeya Jamhuuriyadda Federaalka Itoobiya iyo Somaliland, waana in la ilaaliyo  lana ixtiraamo madax-bannaanideeda iyo wadajirkeeda dhuleed, si loo helo amniga, nabadda, iyo xasilloonida gobolka ah” ayaa lagu yiri qoraalka.

Si kastaba, Dowladda federaalka Soomaaliya ayaa hadda u muuqata mid taageero caalami ah u raadsaneysa difaaca dhulkeeda, kadib markii ay maalmo kahor burisay heshiiskii Muuse Biixi uu Addis Ababa kula gaaray Abiy Ahmed.

The post DEG DEG: DF oo dalab xasaasi ah oo deg degga, kana dhan ah damacii Abiy u dirtay… appeared first on Caasimada Online.