Kacdoon dadweyne oo ka dhan ah damaca Itoobiya oo caawa ka socda Xeebta Liido

[Deeq A.]

Muqdisho (Caasimada Online) – Magaalada Muqdisho waxaa habeenkii labaad ka socda isku soo bax-dadweyne oo looga soo horjeedo damaca Itoobiya ay ku dooneyso badda Soomaaliya.

Kumanaan dadweynaha caasimadda ku nool ah ayaa caawa isugu tegay xeebta Liido ee magaalada Muqdisho, kuwaas oo ku dhawaaqaya erayo ka dhan ah xadgudubka Itoobiya.

Sidoo kale fanaaniin qaadeysa heesto wadani iyo guubaabo bulsho ah ayaa caawa ka qeyb gelaya banaanbaxa ka socda xeebta Liido.

Kumanaan shacab, shaqaalaha dowladda, ciidamo iyo masuuliyiin ah ayaa isugu tegay xeebta Liido, si ay dareenkooda u muujiyaan, ugana dhiidhiyaan damaca Itoobiya ay ku dooneyso badda Soomaaliya.

Sidaan oo kale ayey xalay dadka reer Muqdisho isugu soo baxeen isgoysyada KM4, Taleex ilaa Shaqaalaha iyo Dabka, halkaas waxaa ka dhacay banaanbaxyo dadweyne iyo bandhig faneed lagu guubaabinayey bulshadii isku timid xalay.

Farxiyo Kabayare iyo fanaaniin kale ayaa xalay halkaas ka sameeyey bandhig faneed, iyagoo qaadayey heeso wadani ah, waxaana xalay si nabad ah ku soo dhamaaday dibadbaxyadii dadweyne ee ka dhacay Muqdisho.

Sidoo kale dibadbaxyada lagu soo bandhigayo dareenka dad weynaha Soomaaliyeed ayaa ilaa xalay, maanta iyo caawa ka socda magaalada Muqdisho, waxaana xusid mudan in wax amni darro ah aysan dhicin intii ay socdeen dibadbaxyadaan.

Dadka Soomaaliiyeed ayaa si weyn uga carooday go’aankii uu Muuse Biixi badda Soomaaliya ugu saxiixay dowladda Itoobiya, kacdoonka dadka Soomaaliyeed waxaa sii dheer taageero baaxad leh oo caalamku uu u muujiyey Soomaaliya, iyadoo dunidu ay Itoobiya uga digtay damaceeda ay ku raadineyso badda Soomaaliya.

The post Kacdoon dadweyne oo ka dhan ah damaca Itoobiya oo caawa ka socda Xeebta Liido appeared first on Caasimada Online.