Dhageyso: Maxay Al-Shabaab ka tiri heshiiska BADDA ee Somaliland iyo Ethiopia?

[Deeq A.]

Muqdisho (Caasimada Online) – Afhayeenka guud ee kooxda Al-Shaab, Sheekh Cali Maxamuud Raage (Cali Dheere) oo shir jaraa’id qabtay ayaa si adag uga hadlay heshiiska Somaliland iyo Itoobiya ay shalay ku saxiixdeen magaalada caasimada ah ee Addis Ababa, kaas oo Somaliland 20 KM oo kamid ah badda Soomaaliyeed ugu wareejisay Itoobiya.

Cali Dheere ayaa si weyn uga soo horjeestay heshiiskaasi, isaga oo tilmaamay in marnaba aysan suurtagal noqon doonin in Itoobiya qaadato qayb kamid ah badda Soomaaliya.

“Haddaba haddii aan nahay Xarakada Mujaahidiinta Al-Shabaab waxaan leenahay heshiiskaas waa mid xaaraan ah, baadil ah burcadnimo iyo boob aan geed loogu soo gamban ma aqbaleyno in taako kamid ah dhulka Soomaaliyeed ee Muslimiintu leedahay ay Xabashidu qaadato” ayuu shirkiisa jaraa’id ku yir afhayeenka guud ee kooxda Al-Shabaab.

Sidoo kale wuxuu heshiiskan la meel dhigay inuu lamid yahay qabsashada Yahuudda ee dhulka Falasdiin, sida uu hadalka u dhigay.

Sheekh Cali Dheere oo hadalkiisa sii wata ayaa xusay inay la dagaalami doonaan, uuna dhiggooda ka horreeyo in lala wareego badda Soomaaliyeed.

“Arrintaas waxaa kasoo horreeyo dhiggeena bi’idni laahi tacaalaa, annaga iyo idinka waxaan kala helno ayaan leenanay” ayuu hadalkiisa sii raaciyay Cali Dheere.

Dhanka kale waxa uu weerar culus ku qaaday madaxweyne Muuse Biixi Cabdi oo uu ku eedeeyay inuu qiyaanay dadka Soomaaliyeed.

“Ninka heshiiska soo saxiixay waa nin murtad ah oo aan metalin Ummadda Soomaaliyeed ee Muslimiinta ah, waana qaa’in dalkiisii iyo dadkiisii iibsaday” ayuu mar kale yiri.

Waxaa kale oo uu baaq cod dheer ah u diray shacabka Soomaaliyeed, isaga oo ku booriyay inay u istaagaan difaaca baddooda iyo barrigooda.

“Ummadda Soomaaliyeed ee Muslimka ah waxaan ugu baaqeynaa inay qalabka qaataan si ay ula jihaadaan gaalada Xabashida ah ee dalkeeda kusoo duushay” ayuu yiri gabagadii.

Hadalkan ayaa kusoo aadayo, ayada oo dhakeeda dowladda Soomaaliya ay maanta ka dhiidhisay heshiiska Addis Ababa, ayada oo u yeertay safiirkii u fadhiyay dalka Itoobiya.

Hoos ka dhageyso codka

https://www.caasimada.net/wp-content/uploads/2024/01/Codka-As.mp3The post Dhageyso: Maxay Al-Shabaab ka tiri heshiiska BADDA ee Somaliland iyo Ethiopia? appeared first on Caasimada Online.