Saadaasha hordhaca ah ee doorashada Puntland marka lagu qiimeeyo xildhibaanada soo baxay

[Deeq A.]

In ka badan 90% ayaa la soo xulay xildhibaannada cusub ee Baarlamanka Puntland, sida ay sheegayaan mucluumaadka hordhaca ah.

Kooxaha ololaha u qaabilsan Madaxweyne Siciid Deni iyo Musharrixiinta Mucaaridka ah ayaa si weyn ugu loollamay hawsha xulista xildhibaannada cusub oo hadda dhammaad ku dhaw.

Xildhibaannada cusub ee la soo xulay oo intooda badan la yaqaan dhinacyada ay kala raacsan yihiin ayaa durba saadaal laga bixin karaa, sida ay u kala horreeyan Musharrixiinta loollamaya.

Ilaa afar musharrax ayaa sida saadaashu muujinayso ilaa iyo hadda ugu horreeya marka lagu qiimeeyo xildhibaannada soo baxay ee kala raacsan ololaha dhinacyada u tartamaya xilka Madaxweynaha.

1. Madaxweyne SICIID DENI: Xogaha ayaa tilmaamaya in uu yahay musharraxa ugu horrayn kara dhanka saadaasha wareega kowaad ee doorashada, inkastoo weli muran xooggan ka taagan yahay xubnaha uu ka qortay dhinaca SSC.

2. Amb. Axmed Ciise Cawad: Saadaasha ku qiimaysan xildhibaannada soo baxay ayaa muujinaysa in uu yahay shakhsiga labaad ee ugu sarreeya Musharrixiinta ee ku xigsan kara Siciid Deni, islamarkaana guud ahaan Gobollada xubno ka helay.

3. Wasiir hore Abshid Cumar Huruuse: Marka lagu qiimeeyo xildhibaannada taabacsan ololihiisa ee ku soo baxay Baarlamanka Puntland waxa uu geli karaa kaalinta saddexaad, haddii aan wax iska beddelin saadaasha hordhaca ah.

4. Wasiir hore Xasan Shire Abgaal: Marka laga qiyaas qaato xildhibaannada soo baxay ee taabacsan dhankiisa waxa la saadaalin karaa in uu noqdo musharrax Afraad ee wareegga kowaad, waxaana la rumaysan yahay in uu saamayn ku yeeshay go’aankii SSC.

Saadaashan waa mid hordhac ah oo mar kasta wax iska beddeli karaan, waxayna soo baxday, iyadoo aan weli heshiis lagu ahayn xildhibaannada laga soo doorto SSC, taas oo hadba sida laga yeelo saamayn doonto Tartanka doorashada 2024.

W/Q: Cabdiraxmaan Ciise

The post Saadaasha hordhaca ah ee doorashada Puntland marka lagu qiimeeyo xildhibaanada soo baxay appeared first on Puntland Post.