Dagaal culus oo ka socda koonfurta gobolka MUDUG

[Deeq A.]

Caad (Caasimada Online) – Faahfaahino dheeraad ah ayaa waxaa laga helayaa dagaal culus oo haatan ka socda qaybo kamid ah gobolka Mudug, kaas oo u dhexeeyo ciidamada dowladda Soomaaliya iyo dagaalyahanada Al-Shabaab ee ku sugan koonfurta gobolkaasi.

Dagaalka ayaa yimid kadib markii ciidamada Xoogga dalka ay weerar ku qaadeen fariisimo ay Al-Shabaab ku lahaayeen deegaanka Jeex jeex oo hoostaga magaalada Caad ee Koonfurta gobolka Mudug, waxaana kadib sidaas ku qarxay dagaalka labada dhinac.

Wararka ayaa sheegaya in dagaalkaas jab xoogan lagu gaarsiiyay kooxda Al-Shabaab, welina uu ka socdo magaalada Caad oo maalmihii dambe ay dhaq-dhaqaaqyo ka jireen.

Saraakiil ka tirsan ciidanka milatariga Soomaaliya ayaa shaaca ka qaaday in guul weyn ay ka gaareen dagaalka maanta, isla markaana ay Al-Shabaab ka saareen halkaasi.

Sidoo kale waxa ay intaasi kusii dareen inay baacsanayaan firxadka maleeshiyaadka ku sugnaa halka lagu dagaalamay, kuwaas oo gudaha usii galay dhulka howdka ah.

Dagaalkan waxaa sidoo kale barbar socda duqeymo xoogan oo sidoo kale khasaare xoogan lagu gaarsiiyay kooxda Al-Shabaab oo kasii dhammaanada deegaanada Galmudug.

Ma jiro weli wax hadal ah oo kasoo baxay dhinaca Al-Shabaab oo ku aadan dagaalkaas ee ay guulaha ka sheegatay dowladda federaalka Soomaaliya.

Xaaladda ayaa haatan ah mid aad u kacsan, waxaana weli dhaq-dhaqaaqyo ciidan oo iska soo horjeedo laga dareemayaa qaybo badan oo ka mid ah gobollada dhexe ee dalka.

Si kastaba, dowladda Soomaaliya ayaa sheegtay in howlgallada dib u billowday ee haatan ka socda dalka lagu dilay in ka badan 130 ka tirsanaa maleeshiyaadka kooxda Al-Shabaab.

The post Dagaal culus oo ka socda koonfurta gobolka MUDUG appeared first on Caasimada Online.