Nin dil kasoo gaystay Nairobi oo lagu qabtay MUQDISHO

[Deeq A.]

Muqdisho (Caasimada Online) – Ciidamada ammaanka ee dowladda Soomaaliya, gaar ahaan kuwa Booliska ayaa maanta gacanta kusoo dhigay eedeysane lagu magacaabo Axmed Cabdiraxmaan Cabdullahi, kadib howlgal ay ka sameeyeen magaalada Muqdisho.

Axmed Cabdiraxmaan ayaa ku eedeysayn inuu dil kasoo gaystay magaalada Nairobi ee caasimada dalka Kenya, kadibna uu usoo baxsaday dhanka magaalada Muqdisho.

Ninkan waxaa si gaar ah loogu eedeeyay inuu dilat marxuum lagu magacaabi jiray Maxamed Xasan oo kamid ahaa muwaadiniinta Soomaaliyeed ee ku nool dalka Kenya.

“Ciidanka Boliiska Soomaaliyeed oo gudanaya waajibka ka saaran ilaalinta sharuucda dalka ayaa soo xiray eedeysane baxsad ah laguna magacaabo Axmed Cabdiraxmaan Cabdullahi, kuna eedeysan in uu dilay Marxuum Maxamed Xasan dilkaas oo ka dhacay Caasimadda Dalka Kenya ee Nairobi” ayaa lagu yiri war qoraal ah oo kasoo baxay Booliska Soomaaliya.

Sidoo kale wuxuu talisku sheegay in ninkan si deg-deg ah loo horgeyn doono cadaaladda, si looga qaado tallaabo adag oo sharciga waafaqsan.

“Waxaana la horgeyndoona Cadaalada hadii allaah idmo” ayaa mar kale lasii raaiyay warsaxaafadeedka kasoo baxay Booliska.

Ugu dambeyn taliska ayaa farriin u diray shacabka Soomaaliyeed oo uu ka dalbaday inay kala shaqeeyaan amniga iyo soo qabashada eedeysanayaasha la baadi goobayo

“Muwaadin hadii aad la kulanto ama ay kusoo gaarto falal amni daro ah, la soo xariir Xafiiska gurmad ee Ciidanka Boliiska Soomaaliyeed 991” ayaa lagu soo gabagabeeyay.

Muqdisho oo hadda ka deggan, sidii hore isla markaana uu soo hagaagayo amnigeeda ayaa waxaa haatan howlgallo ballaaran ka wada ciidamada dowladda federaalka Soomaaliya.

The post Nin dil kasoo gaystay Nairobi oo lagu qabtay MUQDISHO appeared first on Caasimada Online.