Puntland oo sheegtay in ay awood ciidan ku furanayso markab ku af-duuban xeebaha Soomaaliya

[Deeq A.]

Dowladda Puntland ayaa ku hanjabtay in ay awood ciidan ku soo furan doonto markab lagu magacaabo MV.Ruen oo ku af-duuban xeebaha Soomaaliya.

Dowladda ayaa sheegtay in hawlgal qorshaysan lagu qaadi doono kooxaha burcad-badeedda ah ee gacanta ku haya si loo badbaadiyo markabkaasi.

” Waxaan rabnaa in aan hawlgal awoodeed kaga dejino markabka islamarkaana ka qaadno tallaabo tusaale iyo cibro u noqota cid kasta oo isku dayda arrintaas” ayuu yiri wasiirka dekedaha Puntland Axmed Yaasiin Saalax.

Wasiir Axmed Yaasiin oo wareysi kooban lala yeeshay ayaa sheegay in ciidanka badda Puntland ee PMPF ay awood buuxda u lee yihiin in fuliyaan hawlgalka.

Markabka MV.Ruen oo ah nooca xamuulka qaada uuna ka babanayay calanka Malta ayaa Khamiistii hore laga qafaashay gacanta cadmeed sida laga soo xigtay EUNAVFOR.

Markabka MV Ruen oo ay saaran yihiin 18 shaqaale ah ayaa ka soo ambabaxay dalka Singapore kuna socday magaalada Gemlik ee dalka Turkiga markii lagu af-duubtay gacanka Cadmeed.

PUNTLAND POST

The post Puntland oo sheegtay in ay awood ciidan ku furanayso markab ku af-duuban xeebaha Soomaaliya appeared first on Puntland Post.