Abu Cubaydah oo shaaciyey inay burburiyeen 135 ka mid ah gaadiidka ciidanka Israa’iil

[Deeq A.]

Afhayeenka Garabka Militariga Xamaas ee Guutada Al-Qassam, Abu Cubaydah ayaa sheegay in Xoogaga Xamaas ay burburiyeen 135 ka mid ah gaadiidka gaashaaman ee Ciidamada Israa’iil, 72-kii saacadood ee la soo dhaafay.

Inkastoo Abu Cubaydahhawada laga waayay, tan iyo markii uu dagaalku dib uga qarxay Marinka Gaza, haddana qoraal saqdii dhexe ee xalay ka soo baxay Xamaas, uuna ku saxeexnaa ayuu ku sheegay in Ciidamada Israa’iil ay jab xoogan kala kulmayaan koonfurta iyo waqooyiga Gaza.

Waxa uu sheegay in Xoogaga Xamaas ay dileen, isla-markaana ay dhaawaceen tobanaan ka mid ah Militariga Israa’iil.

“Ciidamada cadowga qaarkood waxaa lagu laayay dabin loo dhigay godad ay soo galeen iyo dhismayaal ay gabaad ka dhiganayeen,” ayuu yidhi Abu Cubaydah.

Abu Cubaydah ayaa yidhi “Askar fara-badan oo ka tirsan ciidamada cadowga ayaa sidoo kale lagu weeraray hoobiyeyaal iyo gantaalada ridada gaaban, halka gantaalo kalena lagu garaacay magaalooyinka Israa’iil.”

Abu Cubaydah ayaa ku goodiyay in Guutada Al-Qassam ay sii wadi doonto dagaalka lagu xoreynayo dhulka Falastiiniyiinta, illaa iyo inta ay dib kaga saarayaan cadowga, sida uu yidhi.

Dhanka kale Afhayeenka Militariga Israa’iil, Daniel Hagari oo xalay Warbaahinta ka soo muuqday ayaa qiray in ay askar badan ku waayeen dagaalka ka socda Marinka Gaza.

Taliska Militariga Israa’iil ayaa gelinkii dambe ee Khamiistii sheegay in wiil uu dhalay Taliyihii hore ee Ciidamada Israel, Gadi Eisenkot, haatana ka mid ah Guddiga Golaha Wasiirada ee dagaalka lagu dilay Gaza.

Taliska ayaa sheegay in Major Gal Eisenkot oo 25 jir ahaa uu Khamiistii ku dhintay dagaal ka dhacay waqooyiga Gaza.

Source