Denmark ‘oo go’aan ka gaartay’ arrin Muslimiinta ka careysiisay

[Deeq A.]

Copenhagen (Caasimada Online) – Baarlamaanka Denmark ayaa Khamiistii meel-mariyay sharci dambi ka dhigaya in kitaabka Qur’aanka Kariimka ah lagu gubo goobaha fagaarayaasha ah.

Baarlamaanka Denmark ayaa tallaabada u qaaday si loo dejiyo carada dalalka Muslimiinta ah, kadib markii ay Denmark ka dhaceen dibadbaxyo rabshado wata, kadib markii la gubay kitaabka qur’aanka kariimka ah.

Denmark iyo Sweden ayaa sanadkan la kulmay mudaaharaadyo is daba joog ah, halkaas oo dadka uu ku jiro Islaam Naceybka ay gubeen ama si kale u dhaawaceen nuqullo ka mid ah Quraanka Kariimka, taasi oo dhalisay in dawladaha Waqooyiga Yurub ay mamnuucaan dhaqankaas.

Sida uu sheegay wasiirka caddaaladda Peter Hummelgaard, in ka badan 500 oo mudaaharaadyo ah oo ay ku jiraan gubista qur’aanka kariimka ah ama calanka ayaa la diiwaan-geliyay tan iyo bishii July.

“Bannaan-baxyadan oo kale waxay dhaawici karaan xiriirka Danmark la leedahay dalalka kale, danahayaga iyo ugu dambeyntii badbaadadayada,” ayuu yiri Hummelgaard.

“Isu-dheellitirka xoriyatul qawlka ee uu dastuurku ilaalinayo, oo ay ku jirto xaqa dhaleecaynta diinta, iyo amniga qaranka iyada oo laga cabsi qabo in qur’aanka la gubo ay horseedi karto weerarro kaga yimaada Islaamiyiinta.”

Horraantii sanadkaan ayay aheyd markii Rasmus Paludan oo haysta dhalashada dalalka Denmark iyo Sweden uu nuqul kamid ah Qur’aanka Kariimka ah uu ku gubay afaafka hore ee safaaradda Turkiga ee Stocholm, isaga oo mar kalena masaajid hortiisa ku gubay, falalkaasi oo si weyn uga careysiiyay Muslimiinta.

Arrimahan ayaa waxaa ka dhalatay carro xooggan, gaar ahaan Muslimiinta iyo dalalkooda, oo iyagu muujiyay sida ay uga xun yihiin falkaan, ayna tahay in wax laga qabto ficilada noocaan ah ee daan-daansiga ah, kaasi oo ugu dambeyntii ay Denmark meel-marisay go’aan dambi ka dhigaya.

The post Denmark ‘oo go’aan ka gaartay’ arrin Muslimiinta ka careysiisay appeared first on Caasimada Online.