Kulanka Wadajirka ee Baarlamaanka oo Qabsoomayq Kadib Buuqii Hareeyay Bilowgii Todobaadkaan

[Deeq A.]

Xubanaha Labada Aqal ee Baarlamaanka Jamhuuriyadda Federalka Soomaaliya ayaa maanta markale ku kulmaya xarunta golaha shacabka,si ay usii wadaan doodaha la xiriira miisaaniyadda iyo jadwalka kale.

Kulanka ayaa dhacaya kadib markii sabtida oo kulankooda ku dhamaaday buuq iyo fowdo oo xubnaha qaar ee golaha shacabka ayaa ka biyo-diiday ajandihii uu soo gudbiyay guddoonka golaha, kaas oo ahaa meel marinta xisaabxirka miisaaniyadii 2022 iyo iyo akhriska koowaad in la marsiiyo qoondadada miisaaniyadda 2024, taas oo keentay in shirka uu hareeyo isqabqabsi.

Mudanayaasha qaar ayaa ku doodaya in la kala saaro labada ajende oo la qaato waqtiyo kale duwan, buuqa ugu weyn ee hareeyay ayaa sidoo kale ahaa inuusan jirin xeer hoosaad ka dhaxeeya labada gole oo ay ku wadashaqeyn karaan, marka laga reebo kulamo qaar ah.

Guddiga xeerhoosaadka golaha shacabka oo kulan gaar ah la qaatay guddoomiyaha Aadan Madoobe ayaa ka dalbaday in guddiga loo madaxbaneeyo si loo anshaxmariyo xubnaha ku jira golaha oo ku xadgudbay xeerhoosaadka, guddoomiye Madoobe ayaa aqbalay soo jeedintaasi.

Golaha shacabka iyo golaha aqalka sare ayaa markale dib u kulmaya waxaana ay ka doodidoonaan ajandayaashii hore loo soo xusay ee ahaa meel marinta xisaabxirka miisaaniyadii 2022 iyo iyo akhriska koowaad in la marsiiyo qoondadada miisaaniyadda 2024

Source: goobjoog.com