Xabad-joojintii Gaza oo lagu daray laba maalmood oo dheeraad ah

[Deeq A.]

Qatar ayaa ku guuleysatay in laba maalmood oo dheeraad ah lagu daro xabad-joojintii 4ta maalmood ahayd oo ku eekayd Isniintii.

Maanta oo Salaasa ah ayaa lagu wadaa in lasii daayo maxaabiis dheeraad ah sida ay ku heshiiyeen Xamaas iyo Israa’iil.

Xalay ayaa lasii daayey 11 carruur iyo haween u dhashay Israa’iil iyo 33 dhalinyaro reer Falastiin ah.

Maanta ayaa la filayaa in Xamaas siideyso 10 maxbuus oo dheeraad ah, halka Israa’iil laga filayo inay soo deyso 50 Falastiiniyiin ah.

Dhinaca kale Israa’iil ayaa sare u qaaday duulaanka ay ku heyso Daanta Galbeed ee Falastiin iyadoo ka faa’iideysaneysa xabad-joojinta Gaza.

Ugu yaraan 2 qof oo Falastiiniyiin ah ayaa xalay lagu dilay Daanta Galbeed. Tiradda deegaankaasi lagu dilay tan iyo 7dii Oktoober ayaa gaadheysa 240 Falastiiniyiin ah.

Israa’iil ayaa sidoo kale sii wada raafida Falastiiniyiinta Gaza iyadoo tan iyo 7dii Oktoober xabsiga dhigtay 3000 qof. Dadkaasi oo aan kamid ahayn kuwa ay xabsiyada kasoo deysay.

In ka badan 6000 oo Falastiiniyiin ah oo ay ku jiraan kumanaan carruur ah ayaa weli ku jira xabsiyada Israa’iil oo ay kala kulmaan tacadiyo badan.

Source