Waqtiga uu Xasan Sheekh qabsaday oo lagu tilmaamay ‘mid aan macquul ahayn’

[Deeq A.]

London (Caasimada Online) – Madaxweynaha Soomaaliya Xasan Sheekh Maxamuud, oo ka hadlay Machadka Royal United Services Institute ee London, ayaa sheegay in Soomaaliya ay haysato hal sano si ay dalka uga saarto kooxda Al-Shabaab.

Madaxweyne Xasan Sheekh ayaa bishii August sheegay inuu doonayo in Al-Shabaab dalka laga saaro horraanta sannadka 2024. 

“Dhammaadka qorshaha waa December 2024 markaasi oo dhammaan ciidamada ATMIS ay tahay inay dalka ka baxaan,” ayuu yiri madaxweyne Xasan Sheekh.

Haddaba sidee ayay suurtgal u tahay in Al-Shabaab dalka hal san looga saaro.

Axmed Cabdullaahi Kaboole oo ka faalloodda arrimaha amnig,a oo wareysi siiyay BBC ayaa sheegay in ay adag tahay in Al-Shabaab dalka looga saaro halka sano ee madaxweynaha uu qabtay hadii aan wax laga baddelin qaabka dagaalku uu hadda u socdo. 

“Ma aha wax macquul ila ah in Al-Shabaab dalka looga saaro hal sano waayo, waxaan oganahay in ay jiraan caqabado badan oo ay ka mid yihiin roobabka dalka da’ay iyo daadadka xoogga leh, khilaafka siyaasiga ah iyo qeybaha kala duwan ee ciidamada oo aan mideeysan hadii ay yihiin kuwa jooga Puntland, Jubaland iyo guud ahaan dalka,” ayuu yiri.

Ciidanka ATMIS ayuu sheegay haddii ay ka baxaan Soomaaliya marka la gaaro sanadka 2024 -ka ayadoo aan Al-Shabaab laga saarin guud ahan waddanka ay dhici karto khatar weyn taas oo khasbi doonta in si kale loo wajaho Al-Shabaab.

“Haddii ay ciidanka ATMIS baxaan marka la gaaro 2024-ka hadii aan la sameey sadex arrin midkood waxaa dhici doon khatar weyn oo sida Afghanistan oo kale ay suurt gal tahay in ay dhacdo hadii aysan daka Soomaaliyeed isku imaan xilgaas ka hor oo aysan heshiis ka gaarin arimaha ay isku hayaan oo aan xooggana la saarin dagaalka ka dhan ah Al-Shabaab,” ayuu yiri Axmed Kaboole.

Madaxweynaha ayaa yiri “Diiradadu waxay ahayd ciribtirka haraadiga Al-Shabaab.” Howshaas ayuu sheegay in ay sii adkeeyeen daadad ay dad badan ku dhinteen, inkasta oo daadadka ay sidoo kale ku adkeeyeen maleeshiyada inay faafiyaan miinooyinka.

Abaabulka madaxweyne Xasan Sheekh ee ka dhanka ah Al-Shabaab ayaa billowday bishii Ogoosto ee sannadkii hore, iyadoo milatarigu ay taageero ka helayaan maleeshiyo beeleedyo ka dhisan gobollada dhexe ee Soomaaliya.

Wadashaqeyntan naadirka ah waxay gacan ka gaysatay gaarista guulihii ugu muhiimsanaa ee laga gaaray Al-Shabaab tan iyo bartamihii 2010, laakiin Al-Shabaab ayaa sii waday weerarada dhimashada badan ee ka dhanka ah bartilmaameedyada militariga iyo rayidka.

The post Waqtiga uu Xasan Sheekh qabsaday oo lagu tilmaamay ‘mid aan macquul ahayn’ appeared first on Caasimada Online.