Safarka XASAN SHEEKH ee UK iyo saddex arrin oo weyn

[Deeq A.]

London (Caasimada Online) – Madaxweynaha Soomaaliya Xasan Sheekh Maxamuud ayaa gaaray magaalada London ee waddanka Britain. Duulimaadkii koowaad ee toos ah oo Muqdisho illaa Londo ayuu raacay madaxweynuhu, inkasta oo uu ahaa duulimaad khaas ah oo aanay shacabka haysan fursad noocaas ah.

Wixii burburkii ka dambeeyay madaxda Soomaalida dalal kale ayay sii mari jireen markay u socdaan waddanka Ingiriiska, oo lagu sii hubin jiray duulimaadkooda.

Agaasimaha Villa Somalia wuxuu arrintaas ku tilmaamay tallaabo muujineysa isbeddelka cilaaqaadka labada dal ee Soomaaliya iyo UK.

Safarka madaxweyne Xasan Sheekh ee UK waxa uu leeyahay saddex ujeedo. Midda koowaad waa ka qeyb-galka shirka madaxda caalamka ee looga hadlayo la-dagaalanka dhibaatada cunta yarida adduunka.

Hadal-jeedinta madaxweynaha Soomaaliya ee shirkaas ayaa la filayaa in diirada lagu saaro xaaladda cunta xumida ee Soomaaliya. Inta badan dalalka Afrika ayaa wajahaya cunta yari.

Dadka Soomaaliyeed waxay ka guureen isticmaalka wax soo saarkooda cuntada, waxayna ku xirmeen cuntada laga soo dhoofiyo dibedda, taasi oo weli dabooli la’a baahida loo qabo cunto dheeli-tiran, dhinaca kalena sababtay sicir barar maadaama ay qiimo sare kusoo gasho dalka.

Dowladihii iskaga dambeeyay xukunka Soomaaliya burburkii kadib midkoodna diirada ma saarin mowduucan weyn ee la xiriira cunta yarida.

Arrinta labaad ee la filayo inuu dul istaago madaxweynaha Soomaaliya Xasan Sheekh Maxamuud inta uu joogo UK, waa cuna-qabateynta hubka.

Madaxweynaha Soomaaliya Xasan Sheekh Maxamuud oo kulan gaar ah la qaatay ra’iisul wasaaraha Ingiriiska, ayaa qoddobada ugu muhiimsan ee laga wada-hadlay kamid ahaa arrinta cuna-qabateynta hubka.

Ingiriiska maadaama uu kamid yihiin waddamada ugu awoodda badan ee ku jira Golaha Ammaanka Qaramada Midoobay, oo iyagu ah cidda ugu dambeysa ee laga sugayo inay ku dhawaaqan inay qaadeen cuna-qabateynta hubka ee Soomaaliya saarneyd 30-kii sano ee lasoo dhaafay, wax badan ayuu ka gooya mowduucan.

Xogta safarka madaxweynaha sidoo kale waxaa kamid ah in dowladda Ingiriiska kala hadli doono sida ay gacan uga siin laheyd Soomaaliya dagaalka ka dhanka ah kooxaha argagixisada.

UK waxay ku jirtaa dalalka sida joogtada ah u caawiya Soomaaliya.

Amni-darrada iyo jiritaanka argagixisada waa qeyb kamid ah waxyaabaha sababay inay adkaato cunta helista umaddo badan oo ku nool dhulka ay argagixisada ka dagaalanto, waxaana keenaya dadkii oo ay ka hortaagan yihiin wax soo saarkii, iyo dhinaca kale hay’adihii gargaarka oo baddi tagi karin dalalka iyo deegaanada ay ka dagaalamaan kooxaha argagixisada.

Sidoo kale, madaxweyne Xasan Sheekh Maxamuud ayay wararka qaar sheegayaan inuu la hadli doono Jaaliyadda Soomaaliyeed ee ku nool waddanka Ingiriiska.

Saddexdaas qoddob ayaa ugu muhiimsan socdaalka uu madaxweyne Xasan Sheekh ku tegay Britain

The post Safarka XASAN SHEEKH ee UK iyo saddex arrin oo weyn appeared first on Caasimada Online.