Golaha Ammaanka QM oo cusboonaysiiyay xayiraadda hubka, xilli Soomaaliya ay…

[Deeq A.]

New York (Caasimada Online) – Golaha Ammaanka ee Qaramada Midoobay ayaa kordhiytay cuna-qabateynta hubka ee Soomaaliya saaran, xilli dowladda federaalka Soomaaliya ay dadaal badan ugu jirto sidii loo qaadi lahaa cuna-qabateynta hubka.

Golaha Ammaanka ayaa cusbooneysiiyay cuna-qabateynta hubka ee Soomaaliya saaran illaa dhamaadka sanadkan, waxayna qaraarkan ku ansixiyeen kulankoodii 9477-aad.

“Xaaladda Soomaaliay weli waa mid khatar ku ah amniga caalamka,” ayaa lagu yiri go’aankan, oo loo cuskaday kordhinta cuna-qabateynta hubka, iyaga oo sheegay in xaaladda Soomaaliya ay weli mid khatar ah.

Sidoo kale waxa uu Golaha Ammaanka cusbooneysiiyay shaqada guddiga khubarada ee la-socodka cuna-qabataynta Soomaaliya illaa 31-ka December 2023.

Go’aankan ayaa imanaya xilli dowladda federaalka Soomaaliya ay dadaal badan ugu jirto sidii looga qaadi lahaa cuna-qabateynta hubka ee sanadaha badan saaran, islamarkaana Golaha Ammaanka ka codsatay in laga qaado cuna-qabataynta hubka.

Soomaaliya ayaa Golaha Ammaanka la wadaagtay muhiimada qaadista cuna-qabateynta, gaar ahaan sida ay xilligaan ugu baahan tahay inay hesho hub ay kula dagaalanto kooxda Al-Shabaab.

Sanadkii 1991-kii ayaa Soomaaliya la saaray cuna-qabateyntaan, 32-sano kadib waxay dowladda Soomaaliya si weyn ugu ololeyneysaa in laga qaado, maadaama lasoo dhisay dowlad qaadi karta masuuliyadda xakameynta hubka, sida ay ku doodeyso Soomaaliya.

Si kastaba, Soomaaliya ayaa guulo wax ku ool ah ka gaartay bartilmaameedyo ku xusnaa halbeegyada qaadista cuna-qabataynta hubka, iyada oo la dhisay guddi sare oo ka shaqeeya dhammeystirka sharuudaha ku xiran geeddi socodka qaadista cuna-qabataynta hubka.

The post Golaha Ammaanka QM oo cusboonaysiiyay xayiraadda hubka, xilli Soomaaliya ay… appeared first on Caasimada Online.