Xasan Sheekh ma ku deg-degay tallaabada cusub ee uu u qaaday dhanka Eritrea?

[Deeq A.]

Muqdisho (Caasimada Online) – Dowladda Soomaaliya ayaa xoojisay cilaaqaadka kala dhaxeeya waddanka Eritrea. Muqdisho ayaa dhowrkii sano ee lasoo dhaafay ka heshay Asmara, si gaar ah tababar siinta ciidamada, wallow ay dalal kale bixinayeen kharashaadka tababarada.

Dowladdii hore ee madaxweyne Farmaajo ayaa billowday cilaaqaadkan, iyada oo la xasuusto dalalka Ethiopia, Soomaaliya iyo Eritrea ay gaareen heshiis saddex geesood ah oo ay ku dhisanayeen awood mideysan dhaqaale ahaan iyo milatari ahaan.

Madaxweyne Xasan Sheekh oo kamid ahaa siyaasiyiinta sida adag u naqdisa cilaaqaadka Eritrea, ayaa markii uu xafiiska yimid wuxuu isna muujiyay inay Eritrea muhiimad gaar ah u leedahay Soomaaliya.

Wuxuu Xasan Sheekh magacaabay safiirkii ugu horreeyay ee Soomaaliya ay u dirto Eritrea. Dr. Cumar Idiris ayaa noqday safiirkii ugu horreeyay ee Soomaaliya u magacowday Eritrea, kaas oo uu dhawaan waraaqaha aqoonsiga ka guddoomaya madaxweynaha Eritrea Isais Afwerki.

Cumar Idiris ayaa hore usoo noqday safiirka Soomaaliya ee waddanka Qatar. Qoraal uu Danjire Cumar Idiris faafiyay ayuu ku sheegay inuu ku faraxsan yahay safarkii ugu horreeyay ee ay abid Soomaaliya u magacowdo waddanka Eritrea.

Waxay u muuqata inuu madaxweyne Xasan Sheekh qaaday tallaabo dheeraad ah oo uu ku xoojinayo cilaaqaadkii uu Farmaajo alifay ee Eritrea. Inta uu hadda jiray nidaamka madaxweyne Xasan Sheekh waxaa sidoo kale Eritrea loo diray ciidamo cusub oo Soomaali ah oo tababar loo rabay.

Waxaana Eritrea noqotay mid kamid ah labada waddan ee ugu badan ee uu madaxweyne Xasan Sheekh Maxamuud booqday tan iyo markii uu kusoo laabtay xafiiska.

Maxamed Cabdullaahi Farmaajo wuxuu u muuqday nin Eritrea ka leh wax ka ballaaran cilaaqaad caadi ah iyo tababar ciidan, oo taas bedelkeeda raadinaya ku tiirsanaan xooggan oo Asmara iyo Addis Ababa ah, balse weli ma cada gunta waxa uu Xasan Sheekh ka rabo Asmara.

Dadka ka faallooda siyaasadda Soomaaliya ee qaada dhigaya cilaaqaadka deg-degta loo kobcinayo ee Eritrea, waxay leeyihiin waxa Afwerki laga barto waxaa ugu horreeyo xukun jaceyl, diidmo dastuur iyo in dimuqraadiyadda lagu beddelo awood sheegasho, waxaana dadka qaarkii ka digayaan inay madaxda Soomaalida badsadaan macaamilka hoggaamiyahan kali-taliska ah, si uusan ugu talaalin damac xukun isku dhajin ah.

Xubno kamid ahaa nidaamkii hore ee Farmaajo waxay sheegaan in madaxweynuhu inta uusan ku xiran Asmara inuu ahaa nin dimuqraadi ah oo aaminsan qori isku dhiibka xukunka iyo xasilloonida.

Marka laga tago tababarada ciidamada, majirto xadaarad kale, faham dowladeed iyo dimuqraadiyad laga filayo inay madaxda Soomaalida ka dhaxlaan cilaaqaadka joogtada ah ee hoggaamiyaha Eritrea, ayay leeyihiin dadka faalloonaya qoddobkaan.

The post Xasan Sheekh ma ku deg-degay tallaabada cusub ee uu u qaaday dhanka Eritrea? appeared first on Caasimada Online.