COSOBLE: Ficilka xun ee Soomaalida aysan weli ka tegin in ka badan 3000 sano

[Deeq A.]

Muqdisho (Caasimada Online) – Madaxweynihii hore HirShabelle Cali Cabdullahi Cosoble ayaa sheegay in Soomaalida in ka badan 3000 sano oo ay ku nooshahay Geeska Afrika aysan weli ka tegin ficilka foosha xun ee dilka.

“Muddo ka badan 3000 sano oo ay Soomaalida ku nooshahay geeska Afrika iyo marxalad kasta oo ay ku jiraanba waxaa jira hal ficil oo aysan weligood ka tagin. Ficilkaas waa dilka uunka Ilahey,” ayuu Cosoble ku yiri qormo dheer oo uga hadlayo arrintaan.

Soomaalida ayuu sheegay in ay weligoodba caan ku ahaayeen welina caan ku yihiin dilka noole kasta ee uu Ilahey ku abuuray dhulka ay ku nool yihiin, sida uu ku yiri qormadan.

Hoos ka aqriso qormada Cosoble oo dhameystiran;

Muddo ka badan 3000 sano oo ay Soomaalida ku nooshahay geeska Afrika iyo marxalad kasta oo ay ku jiraanba waxaa jira hal ficil oo aysan weligood ka tagin. Ficilkaas waa “dilka uunka Ilahey”.

Soomaalida wexey weligoodba caan ku ahaayeen welina caan ku yihiin dilka noole kasta ee uu Ilahey ku abuuray dhulka ay ku nool yihiin; sida dadka, ugaarta, shimbiraha, xamaaratada, berri-biyoodka, xasharaadka iyo dhirta.

Xataa markey yeesheen magaalooyin iyo maamullo kama aaney tegin ficilladii foosha xumaa ee ay lahaayeen Islaamka ka hor ee waxaa weliba ugu darsamay been sheegid, dad isku dir iyo boobka hantida ummadda.

Ma qiyaasi kartaa dadka lagu dilay geeska Afrika kontonkii sano ee u dambeeyay? Boqolkii sano ee la soo dhaafay imisa Soomaali ah ayey Soomaali iska dishay? Shantii boqol ee sano ee la soo dhaafay imisey kula tahay in la dilay? Diinta islaamka markey na soo gaartay ilaa maanta imisa Soomaali ah ayaan xaq darro isaga dilnay?

Aaway ugaartuu Ilahey ku abuuray dhulkaan? Aaway jeertii iyo yaxaaskii? Aaway dhirtii? Aaway shimbirihii? Miyi iyo magaalaba caruurta Soomaalida mexey ku sameeyaan shimbirkii dhulka u soo dega?

Ummaddii ka reebtoomi weyda wuxuu Ilahey ka reebay sow ma aha ummad ku caasiday Allahii dhulkan sameeyay ee faray ineysan dhiig si xaq darro ah ugu daadin?

Maxey diinteena nooga reebi weyday dilka uunka Ilahey? Ma kuu muuqataa in aanan aheyn dad diintooda ixtiraama?

Wadammada caalamka waxaa lagu qiyaasaa boqolkiiba inta muslimka ah. Waxaad maqleysaa waddan hebel boqolkiiba 30 ama 40 ama 80 ayaa muslim ah.

Soomaalida waxaa la yirahdaa waa dad boqolkiiba boqol Muslim ah, waa sax laakiin waxaa hadana la dhihi karaa waa dad 20% ilaa 30% ku dhaqma diinta Islaamka, sidaa darteed marka xiga ee aad tilmaameyso Soomaali runta ka sheeg oo waxaad dhahdaa Soomaali waa dad 25% ilaa 30% ku dhaqma diinta Islaamka.

Tiradaa yar ee sida saxa ah ugu dhaqanta diinta ayuu Ilaahey nagu badbaadinayaa ee mar horey nagu dhici karaayeen zilzaal, duufaan ama uu Ilaahey nagu soo fasixi lahaa badda nagu hareereysan.

Ilahow naga dhig dad 100% ku dhaqma diinta Islaamka. Aamiin

The post COSOBLE: Ficilka xun ee Soomaalida aysan weli ka tegin in ka badan 3000 sano appeared first on Caasimada Online.