Xog ka cusub nin Soomaali ah oo xaaskiisa ku dilay Turkiga

[Deeq A.]

Istanbul (Caasimada Online) – Faah-faahino dheeraad ah ayaa kasoo baxaya nin Soomaali ah oo xaaskiisa ku dilay hotel ku yaalla magaalada Istanbul ee dalka Turkiga.

Ninkan iyo xaaskiisa ayaa la sheegay in markii hore dalxiis ahaan u yimaadeen dalka Turkiga, iyaga oo ka yimid magaalada London se dalka Ingiriiska.

Gabadha la dilay oo lagu magacaabi jiray Ayaan Maxamed Dhobo ayaa la xaqiijiyay in ay haysatay dhalashada dalka Ingiriiska.

Dilka ayaa waxa uu ninka u adeegsaday kashawiito, sida ay ku warrantay Warbaahinta Turkiga oo baahisay dhacdadaan lagu dilay Ayaan oo da’deeda lagu sheegay 26-sanno jir.

Wararka ayaa intaas kusii daraya in ninkaan u qirtay dambiga uu galay, kaasi oo haatan ku jira gacanta ciidanka Booliska dalka Turkiga, oo kasoo qabtay hoteelka uu ka dhacay dilka.

Si rasmi ah weli looma oga sababta dhabta ah ee ka dambeysa dilkaan, hase yeeshe wararka qaar ayaa sheegay in ninka ay xaaskiisa siisay waxyaabo maan-dooriya, kadibna uu soo kala dhex-galay muran sababay in uu ugu dambeyn khaarajiyo.

Sidoo kale waxaa jira sawir ay baahisay warbaahinta Turkiga oo ay ku sheegeen inay tahay gabadha la dilay, balse markii dambe la ogaaday inay khalad tahay.

Si kastaba, Isticmaalka waxyaabaha maanka dooriya oo kusoo badanayay muddooyinkii dambe Soomaalida ayaa loo aaneeya mararka qaar inay ka dambeeyan dhacdooyin naxdin badan, oo lamid ah middaan.

The post Xog ka cusub nin Soomaali ah oo xaaskiisa ku dilay Turkiga appeared first on Caasimada Online.