Ciidanka Israel oo gudaha u galay isbitaalka ugu weyn Gaza kadib…

[Deeq A.]

Gaza (Caasimada Online) – Ciidamada Israel ayaa maanta gudaha u galay isbitaalka ugu weyn ee magaalada Gaza, waxaana ay baarayeen qolalka iyo qeybta hoose ee isbitaalka, sida ay sheegeen goob joogayaal.

Tallaabadan ayaa soo gaba-gabeysay go’doomin maalmo qaatay oo sababtay qeylo-dhaan caalami ah oo ku aadan nolosha kumannaan rayid ah oo ku go’doonsan gudaha Gaza.

Isbitaalka Al Shifa ee magaalada Gaza ayaa noqday bartilmaameedka ugu weyn ee howlgalka dhulka ee ciidamada Israel, kuwaas oo sheegay in godad ku hoos yaalla isbitaalka hoostiisa ay dagaalyahannada Xamaas ay “hal-bowle” u ahaayeen, taas oo Xamaas ay beenisay.

Indhaha caalamka ayaa diiradda saaray jiritaanka boqollaal bukaan ah oo ku xayiran gudaha, iyaga oo dhaqaatiirta isbitaalka aysan heysan wax awood ah oo ay ku shaqeeyaan iyo agabka caafimaadka aasaasiga ah, iyo kumannaan rayid ah oo barakacayaal ah oo hoy u raadsaday.

Saraakiisha Gaza ayaa sheegay in bukaanno badan oo ay ku jiraan saddex ilmood oo dhawaan dhashay ay dhinteen maalmihii lasoo dhaafay taas oo ka dhalatay hareeraynta Israa’iil ee isbitaalka.

Israa’iil waxay sheegtay in ciidamadeedu ay ku dileen dagaal yahanno ka tirsan Xamaas agagaarka isbitaalka kahor intii aysan galin. Waxay sheegeen in isbitaalka u keeneen sahay caafimaad oo loogu talagalay dadkii ku jiray.

The post Ciidanka Israel oo gudaha u galay isbitaalka ugu weyn Gaza kadib… appeared first on Caasimada Online.