Dhimasho iyo dhaawacyo ka dhashay dagaal caawa ka dhacay Guriceel

[Deeq A.]

Guriceel (Caasimada Online) – Wararka naga soo gaaraya magaalada Guriceel ee gobolka Galgaduud ayaa sheegaya in laba qof ay ku dhinteen inta la xaqiijiyey ilaa 4 kalena ay ku dhaawacmeen is rasaasayn caawa dhacday.

Israsaaseyntaan ayaa caawa dhex martay ciidamada amniga iyo kooxo budhcad ah, sida ay noo xaqiijiyeen saraakiil ka tirsan booliska.

Iska hor imaadka ayaa ciidanka booliska iyo kuwa nabad sugidda oo dhinac ah wuxuu dhex maray kooxdan lagu tilmaamay dabley hubaysan oo burcad lagu sheegay.

Iska hor-imaadkaan ayaa dhacay kadib markii ay ciidamada amnigu bilaabeen hawlgal ay doonayeen inay ku sameeyaan hub ka dhigis.

Mid ka mid ah labada dhimasho ayaa la xaqiijiyey inuu yahay askari ka tirsan booliska halka kan kale uu yahay qof shacab ah.

Weli lama shaacin tirada rasmiga ah ee khasaraha, waxay wararku nagu soo gaarayaan in laba ka mid ah dadka dhaawacmay ay yihiin shacab, halka laba kale ay yihiin askartii hawlgalka ku jirtay.

Qaar ka mid ah dadka dhaawacmay ayaa la gaarsiiyay isbitaalka Al-shifa ee magaalada Guriceel.

Ciidamada amniga ayaa hadda wada hawlgal lagu baadi goobayo raggii sameeyey iska caabinta hey’adaha amniga ee geystay khasaarahaan.

The post Dhimasho iyo dhaawacyo ka dhashay dagaal caawa ka dhacay Guriceel appeared first on Caasimada Online.