Taliyaha Booliska Oo Furay Rug Bileys oo laga Hirgaliyay Madaarka Hargeysa

[Deeq A.]

Hargeysa(Qaran news)-Taliyaha Ciidanka Booliska JSL Sarreeye Gaas Maxamed Aadan Saqadhi (Dabagale) ayaa xadhiga jaray saldhig cusub oo ay hay’adda Duulista iyo Madaarradu ka hirgelisay garoonka diyaaradaha ee magaalada Hargeysa.

Taliye Dabagale ayaa sheegay si ammaankii xaafada Maxamuud Haybe iyo garoonka diyaaradahaba loo sugo, waxa uu bulshada ka codsaday inay la shaqeeyaan ciidamada booliska, waxa uu maareeyaha garoonka diyaaraha Hargeysa uga mahadceliyay hirgelinta Saldhigani, waxaanu xusay in ay baahi weyn dabooli doonto.

Maareeyaha Hay’adda Duulista iyo Madaaradda Somaliland Cumar-seyid Cabdillaahi Aadan, waxaanu ka warbixiyey saldhiggan cusub ee ay hay’addiisu ka hirgelisay madaarka caasimadda Hargeysa, ayaa tilmaamay in saldhiggan loo dhisay hab caalami ah oo ka duwan habka ay saldhigyadda kale u dhisan yihiin, waxaanu cadeeyey in saldhiggan ay ku baxday lacag dhan 113 kun oo Dollar.

Wasiirrada wasaaraddaha Deegaanka iyo Isbedelka Cimilada Marwo Shukri Xaaji Ismaaciil (Baandare), Horumarinta Beeraha Eng Cabdiqaadir Iimaan Warsame, Guddoomiyaha Baanka Dhexe Cali Cabdillaahi Daahir, Badhasaabka gobolka Maroodi-jeex iyo ku xigeenka Ganacsiga Muuse Ibraahim Selef, ayaa ku ammaanay Maareeyaha Hay’adda Duulista iyo Madaarada hirgelinta saldhiggan, iyaga oo cadeeyey in baahi weyn loo qabay saldhiggan.

Qaran News