DEG DEG: Labo nin oo caawa lagu dilay bartamaha Dhuusamareeb

[Deeq A.]

Dhuusamareeb (Caasimada Online) –Waxaa salaadii Maqrib kadib bartamaha magaalada Dhuusamareeb lagu dilay labo nin oo shacab ah, xilli uu magaalada Roob ka da’ayo.

Rag hubeysan ayaa labada nin ku dhex toogtay suuqa weyn ee magaalada Dhuusamareeb, waxayna ahaayeen ganacsato aad looga yaqiinay magaalada.

Dilkaan ayaa salka ku haya aano qabiil uu dhaxeysa beelaha Cayr iyo Saleebaan ee Habargidir.

Ragga lagu dhex dilay magaalada Dhuusamareeb ayaa ahaa Saleebaan, waxaana dilay dabley la aaminsan yahay inay ka soo jeedaan beesha Cayr.

Raggii dilay labada nin ee Saleebaanka ah ayaa baxsaday, waxaana magaalada ka bilowday baaritaano culus oo lagu baacsanayo raggii dilka geystay.

Waxaa la’aaminsan yahay in dilkaan uu salka ku hayo aano-qabiil oo ka taagan deegaanka Xananboore oo waqooyi ka xiga magaalada Dhuusamareeb.

Dabley ka soo jeeda beesha Saleebaan ayaa shalay deegaanka Xananbuure ku dilay nin Cayr ah, iyagoo dhaawacay mid kale.

Xiisadda ka taagan Xananbuure ee u dhaxeysa Cayr iyo Saleebaan ayaa dabadheeraatay, waxayna hadda ku fiday magaalooyinka waaweyn.

Falka dilka ah ee caawa dhacay ayaa cirka ku sii shareeraya aanooyinkii qabiil ee u dhaxeeyey labada beelood oo kala dega magaalooyinka Cadaado iyo Dhuusamareeb, xiisadaan ayaa markii hore ku ekeed tuulooyinka u dhaxeeya labada magaalo.

The post DEG DEG: Labo nin oo caawa lagu dilay bartamaha Dhuusamareeb appeared first on Caasimada Online.