“Waan soo Dhaweynaynaa in Itoobiya Isticmaasho Dekadaha Soomaalida” Danjiraha Soomaaliya u fadhiya Addisababa

[Deeq A.]

“Waan soo Dhaweynaynaa in Itoobiya Isticmaasho Dekadaha Soomaalida” Danjiraha Soomaaliya u fadhiya Addisababa

Hargeysa(Qaran news)- Cabdillaahi Maxamed Warfaa, Danjiraha dowladda Soomaaliya u fadhiya dalka Itoobiya, ayaa sheegay inay soo dhaweynayaan inay Itoobiya isticmaasho dekaddaha Soomaaliya.
Waxaanu sidan ku sheegay wareysi uu siiyay Etv Af- Soomaali, Telefishanka Qaranka Itoobiya shalay.

Waxaanu yidhi.“Soomaaliya way soo dhaweynaysa isticmaalka la isticmaalayo dekaddaheeda, waa dekaddo wax soo saarka looga faa’idaysanayo, badeecadaha adduunka loo dirayo in looga faa’iideysto, Soomaaliya markasta way soo dhaweynaysaa.

Itoobiya waa dal aanu daris nahay, Soomaaliya wax badan la qabtay, sidaasi darteed in dekaddaha Soomaaliya la isticmaalo waanu soo dhaweynaynaa, Soomaaliyana way ka faa’ideysa intii cid kale ka faa’idi lahayd, Soomaaliya dhaqaale badan ayaa kaga xaniban in aan la isticmaalin dekaddaha, marka in dekaddaha la isticmaalo Soomaaliya ayay dani ugu jirtaa, waxay dani ugu jirta Itoobiya, waxay ugu jirta dalkasta oo isticmaalaya dekaddaha Soomaaliya, Soomaaliyana way soo dhawaynaysaa in la isticmaalo dekaddaheeda, oo dhaqaale badani ka soo galo, dalalkaasina baahidooda uga faa’idaystaan, sidaasi darteed culays xaggaasi ka jira majiro, 120-ka Milyen ee Itoobiya ku nooli in wax soo saarka ay gaadhsiiyaan ayaanu doonayna bariga Afrika oo dhan, waxay ku gaadhsiinkaraana waa isticmaalka dekaddaha Soomaaliya oo la isticmaalo, wada xaajoodyo ayaa ka socda, dowladdaha Itoobiya iyo Soomaaliyana ay mustaqbal wanaagsan kawada yeelan doonaan”

Qaran News