Qatar Iyo Maraykanka Oo Ku Kala Aragti Duwanaaday Dagaalka Gaza

[Deeq A.]

Raysal wasaaraha Qatar Sheikh Mohammed Bin Abdulrahman al-Thani oo shir jaraa’iid la qabtay Xoghayaha arrimaha dibada Mareykanka Antony Blinken oo shalay booqday dalkaasi, ayaa sheegay in dowlada Qatar kasoo horjeedo duqeynta ku socota Gaza, isla markaana ay wadaan dadaal lagu soo siideynayo dadka ay qafaasheen Xamaas.

Blinken oo shalay booqasho ku tagay dalka Qatar ayaa dadaal ugu jira in wadankaasi ka caawiyo soodeynta dadka ay Xamaas gacanta ku dhigtay oo gaadhaya 150 qof oo ay ku jiraan 27 muwaadin oo Mareykan ah.

Ururka Xamaas ayaa xafiis rasmi ah ku leh dalka Qatar.

Qatar iyo Mareykanka ayaa u muuqday inay ku kala aragti duwan yihiin duqeynta Israel ka wado Gaza, iyadoo Qatar ku baaqday in xabad joojin la sameeyo isla markaana wado loo furo Gaza sidii gargaar bini’aadamnimo loo gaadhsiin lahaa siduu sheegaya Sheikh Mohamed al-Thani.

Blinken ayaa dhankiisa sheegay in Israel ay xaq u leedahay in ay is-difaacdo isla markaana ka hortagto in Xamaas markale ay soo weerarto, isagoo ka gaabsaday su’aalo saxaafada weydiisay ee Xasuuqa iyo baro-kicinta ay Israel ka wado Gaza.

Xoghayaha Arrimaha dibada Maraykanka ayaa magaalada Amman ee dalka Urdun (Jordan) kulan kula yeeshay Madaxweynaha Falastiin Maxamuud Cabaas, wuxuuna Blinken sheegay inay ka wadahadleen sidii maamulka Falastiin kala shaqeyn lahaa Israel in la dajiyo xaalada Daanta Galbeed ee dhulka la heysto oo go’adoon ku jira.

Source