Maareeye oo weeraray soo dhaweyntii hoggaamiyaha SSC, kuna tilmaamay inuu yahay…

[Deeq A.]

Muqdisho (Caasimada Online) – Xildhibaan Maxamed Cabdi Xayir (Maareeye) ayaa sheegay inuu la yaaban yahay sidii galabta Muqdisho loogu soo dhaweeyey hoggaamiyaha SSC Khaatumo Cabduqaadir Firdhiye.

Xildhibaan Maareeye ayaa hoggaamiyaha SSC ku tilmaamay guddoomiyaha degmada Laascaanood, isagoo sheegay inuu la yaabay sida nin guddoomiye degmo ah Muqdisho, sida uu hadalkiisa u dhigay.

“Waxaan fiirsaday soo dhoweyntii Xamar loogu sameeyey Gudoomiyaha cusub ee dadka degaanku u doorteen Gudoomiyaha Degmada Laascaanood, Gudoomiye Firdhiye, weligay ma arag Gudoomiye Degmo oo ka taageerayaal badan, tolow maxaa jira, oo maxay tahay waxan oo sawaxan iyo xamaasad ahi,” ayuu yiri Maareeye.

Qoraalka Xildhibaan Maareeye ayaa intaas ku sii daray, “Waxaan isweydiiyey tolow ma waxaa isbedelay siyaasadii DFS ee ahayd in arinta Somaliland oo isu-dhan lagu dhameeyo wadahadal nabadeed oo waxaa laga dhigay in Somaliland degmo degmo loo soo furfuro oo Dawladda Federaalku degmo kasta u aqoonsato maamul ka tirsan Federaalka.”

Si u muuqata kaftan ayuu Maareeye qeybaha dambe ee qoraalkiisa ugu sheegay in degmada Caynaba ee gobolka Sool uu ka soo furanayo Somaliland, hadiiba sida hoggaamiya Cabdulqaadir Firdhiye loo maamuusi doono.

“Sayidkii wuxuu yidhi “Caamir waa saleelee annaa haatan caymadiye” waar haday sidaas tahay oo hadaan Degmo Somaliland ka soo goosto sidan lay soo dhoweynayo oo 10 Baabuur oo Bulletproof ah iyo Guri 100 askari waardiyeynayso Madaxtooyada layga siinayo, anniga laftayda madaxda Dawladdu wax hay fahamsiiyeen, waan ka tegayaa Xildhibaanka oo waxaan Somaliland ka xoreysanayaa Degmadayda Caynabo ee isla Gobolka Sool oo degaan ahaan ka weyn Degmada Laascaanood, kana kheyraad badan, ka dibna Xamar baan ka soo degayaa ee halay aqoonsado oo Protocol-kan oo kale halaygu soo dhoweeya,” ayuu yiri.

Xildhibaan Maxamed Cabdi Xayir Maareeye ayaa ka soo jeeda Somaliland, wuxuuna qoraalkaan ku muujiyey sida uu uga xun yahay in dowladda federaal ay maamuuso oo soo dhaweyso hoggaamiyaha Khaatumo.

Dowladda Soomaaliya ayaa Muqdisho ku casuumtay hoggaamiyaha SSC Khaatumo oo galabta Muqdisho ka soo degay, waxaana si weyn u soo dhaweeyey shacabka reer Muqdisho iyo masuuliyiin uu horkacayey wasiirka arrimaha gudaha dowladda federaalka Axmed Macalin Fiqi.

The post Maareeye oo weeraray soo dhaweyntii hoggaamiyaha SSC, kuna tilmaamay inuu yahay… appeared first on Caasimada Online.