Daawo: Muxuu Wasiir Fiqi ka yiri imaashaha Muqdisho ee hoggaamiyaha Khaatumo?

[Deeq A.]

Muqdisho (Caasimada Online) – Wasiirka arrimaha gudaha dowladda federaalka Soomaaliya Axmed Macalin Fiqi iyo masuuliyiin uu hor kacayo ayaa galabta magaalada Muqdisho ku soo dhaweeyey hoggaamiyaha SSC Khaatumo Cabdulqaadir Axmed Cali Firdhiye oo soo gaaray Muqdisho.

Dowladda Soomaaliya ayuu casuumaad ka helay wafdigaan ka socda Khaatumo, sida uu goobtii soo dhaweynta ka shaaciyey guddoomiyaha SSC Cabdulqaadir Firdhiye.

Wasiir Fiqi oo soo dhaweyntii kadib hadal kooban ka jeediyey ayaa yiri, “Sharaf bay inoo ahayd galabta in aan ku soo dhowayno caasimadda Soomaaliya ee Muqdisho wafdi uu hogaaminayo hogaamiyaha SSC Khaatumo Md. Cabdulqaadir Axmed Firdhiye oo booqasho rasmi ah iyo casuumaad loo fidiyey ku yimid Muqdisho.”

Fiqi ayaa intaas ku sii daray, “Hoggaamiyaha iyo wafdigiisa waxaan leeyahay ku soo dhowaada caasimadda dalkiina, joogitaan wanaagsan ayaan idin rajaynayaa.”

Sidoo kale wasiirka ayaa sheegay in wafdiga guddoomiyaha SSC ay la kulmi doonaan madaxda ugu sareysa dalka, isla markaana ay ka wada hadli doonaan waxyaabihii loogu yeeray.

Wasiir Axmed Macalin Fiqi ayaa intaas ku soo daray, “Kusoo dhawaada meel aad madaxweynaha iyo Ra’iisul wasaaraha aad ugala wada hadli doontaan mawaadiicdiin, dowladduna halgankiina halka wadiiqo ku soday way garab taagneyd.”

Soo dhaweyn kadib, waxaa warbaahinta garoonka kula hadlay hoggaamiye Cabdulqaadir Firdhiye, isagoo shaaciyey inay Muqdisho ku yimaadeen casuumaad ay ka heleen madaxda dowladda federaalka Soomaaliya.

“Waxaan Muqdisho ku nimid casuumaad aan ka helnay xukuumadda Soomaaliya, magaalada waa hooyada Soomaaliya, SSC waxay ka mid tahay umadda Soomaaliyeed ee Muqdisho ay caasimadda u tahay,” ayuu yiri hoggaamiyaha Khaatumo.

Wuxuu sheegay in Muqdisho ay tahay xudunta umadda Soomaaliyeed, isla markaana ay masuuliyiinta Khaatumo imaan lahaayeen xitaa hadii aysan ku casuumin madaxda dowladda Soomaaliya.

Hoos ka daawo hadalkii Fiqi

The post Daawo: Muxuu Wasiir Fiqi ka yiri imaashaha Muqdisho ee hoggaamiyaha Khaatumo? appeared first on Caasimada Online.