Xildhibaan Sanbaloolshe oo shaaciyey xogta sida lagu sii daayey Cali Xooshow

[Deeq A.]

Muqdisho (Caasimada Online) – Xildhibaan Cabdullahi Maxamed Cali (Sanbalooshe) ayaa soo saaray qoraal uu ku sharaxay sidii ay ugu suurta-hashay inay cabsiga ka soo daayaan Cali Cabdi Cali Xooshow oo maalmihii lasoo dhaafay ku xirnaa Muqdisho.

Xooshow oo ka tirsanaa wasaaradda arrimaha dibadda ayaa waxaa maalmo ka hor soo xirtay hey’adda NISA, in kastoo aan la shaacin dembiga loo heysto, hadana wararka qaar waxay sheegayaan in dhowr jeer uu Cali Yare Cali oo dowladda mucaarada ka gacan siiyey inuu dib u helo bartiisa Facebook oo laga xiray.

Sanbalooshe ayaa sheegay in xildhibaanada beesha Xawaadle ay xoriyad u raadinta Xooshow u wakiisheen isaga iyo Xildhibaan Ciid, isla markaana ay u tageen Agaasimaha NISA Mahad Salaad oo amray in xabsiga laga sii daayo Xooshow.

“Waxaan jecleystay in aan halkaan ku cadeeyo in soo deynta Cali Cabdi Cali Xoosho ay ka dhalatay dadaal ay u dhamaayeen dhamaan xildhibaanada Beesha oo aan kala har laheyn ayaga oo aniga iyo Xildhibaan Ciid inoo wakiishay in aan u tagno Agaasimaha Hayada NISA Mudane Mahad Maxamed Salaad, kaas oo runtii si qiima badan noo soo dhaweeyey isla markaasna si sharaf leh nooga aqbalay in uu codsigeynii  ku aadanaa soo deynta Agaasime Xooshow,” ayuu qoraalkiisa ku yiri Sanbaloolshe.

Qoraalka Xildhibaan Cabdullahi Sanbaloolshe ayaa intaas ku sii daray, “Xildhibanadu waa ku waajib in ay si Hagar-la’aan ah ugu adeegaan dadka ay matalaan sidaa darteed ma ahan in dhibco siyaasadeed laga raadiyo ama la is muujiyo markii wax yar la qabtaba.”

Sanbaloolshe ayaa dalbaday in wararka ku saabsan xariga Xooshow halkaas lagu demiyo, maadaama ay dowladdu awood u leedahay inay qof xirto.

“Dowladnimadu Waa xoogeysatay war xuma tashiilka iyo xaalad abuurkana hala yareeyo. Dadka waxa xiri kara laakiin aan soo deyn karina yaan warkooda la dhegeysanin. Mahasanidiin,” ayuu qoraalkiisa ku yiri Xildhibaan Cabdullahi Sanbaloolshe.

Cali Cabdi Cali Xooshow oo loo yaqaano Cali Suxeyfa wuxuu mar soo ahaa Weriye ruugcadaa ah, hadda wuxuu ka tirsan yahay shaqaalaha wasaaradda arrimaha dibadda Soomaaliya, wuxuuna ku magacaaban yahay agaasimaha warfaafinta ee wasaaradda.

Xooshow ayaa ku dhawaad toddobaad ku xirnaa Muqdisho, waxaana aad loo dalbananyey in xoriyadiisa la siiyo, inta badan siyaasiyiinta, saxafiyiinta iyo saaxiibadiis ayaa maalmahaan dowladda ka codsanayey in Cali Xooshow xoriyadiisa la siiyo.

The post Xildhibaan Sanbaloolshe oo shaaciyey xogta sida lagu sii daayey Cali Xooshow appeared first on Caasimada Online.