Wasiirro Ka Tirsan Galmudug oo Xarigga Ka Jaray Xarunta Xanaanada Carruurta Ee Cadaado

[Deeq A.]

Wasiirro ka tirsan dowlad goboleedka Galmudug, maamulka degmada Cadaado iyo marti sharaf kale ayaa ka qaybgalay furitaanka xarunta xanaanada Carruurta ee Misbaax oo galabta xariga laga jaray,taas oo ay hirgalinteeda iyo hawl socodsiinteeda iska kaashadeen wasaaradda waxbarashada Galmudug iyo hay’adda Save the children.

Axmed Xuseen Khayre oo ka tirsan wasaaradda waxbarashada Galmudug ayaa xusay in mashruucan xananada carruurtu uu kaalin wayn ka qaadanayo horumarinta waxbarashada carruurta iyo in la yareeyo carruurta waxbarasho la’aanta ah ama ka daaha.

Guddoomiyaha degmada Cadaado Faarax Diiriye Warsame oo wasaaradda waxbarashada Galmudug uga mahadceliyey inay Cadaado u xulatay mashruucan ayaa balan qaaday in maamulka degmadu uu kaalin wayn ka qaadanayo sidii xaruntan loo horumarin lahaa loogana faa’iideysan lahaa.

Maxamed Xaashi Dhoorre wasiirka wasaaradda waxbarashada Galmudug ayaa sheegay in wasaaraddu ay xaruntan u diyaarisay macalimiin xirfad gaar ah u leh tarabiyada Carruurta, waxaana uu bulshada Cadaado ku dhiirri galiyey inay ka faa’iideystaan.

Xaruntan ayaa qaata ilaa 120-Carruur ah, waxaana loogu tagalagalay in lagu siiyo xanaano, waxbaridda iyo tarabiyada, sidoo kalena ay heli doonaan cunno inta ay xarunta joogaan.

Wasiir ku xigeenka wasaaradda beeraha Galmudug Xasan Cascaseey. wasiirka wasaaradda xanaanada xoolaha Galmudug Cabdulaahi Cabdiraxmaan Tootoole iyo mas’uuliyiin kale oo munaasabadda ka haday ayaa fursad muhiima ku tilmaamay hirgalinta xaruntan, iyagoo soo jeediyey in bulshada Cadaado ay dhamaystiraan waxyaabaka ka dhiman oo uu ka mid yahay gaarigii carruurta qaadi lahaa.

Goobjoog News

Source: goobjoog.com