Jabhadda buurta Gacan-Libaax oo afduub kale ka gaysatay Somaliland

[Deeq A.]

Burco (Caasimada Online) – Wararka naga soo gaaraya Somaliland ayaa sheegaya in maanta dabley ka tirsan jabhadda hubeysan ee ku sugan buurta Gacan-Libaax ay weerar  ka gaysteen magaalada Burco ee xarunta gobolka Togdheer ee waqooyiga Soomaaliya.

Kooxda weerarka gaysatay oo ku socotay saddex baabuur ayaa afduubatay baabuur Lan kurusar ah oo ay leedahay xukuumada Somaliland, kaas oo ay xoog ku kaxeysteen.

Ilo deegaanka ah ayaa innoo sheegay in gaariga la faduubtay uu leeyahay maareeye ku xigeenka Wakaaladda Biyaha Burco, sidoo kale waxay qaateen telefoonkii maareeyaha.

Xaaladda ayaa haatan kacsan, waxaana howlgallo wada ciidanka Booliska magaalada Burco oo dabagal ku haya kooxda ka dambeysay falkaasi oo meesha isaga baxsatay.

Waa weerarkii 3-aad oo ay jabhaddani ka gaysaneyso deegaanada Somaliland, waxayna aheyd dhowaan markii ay kooxdani afduubatay gaari ay leedahay dowladda oo ku sugnaa degmada Dhoqoshay ee isla gobolka Togdheer, inkasta oo ay markii dambe sii daayeen.

Arrintan ayaa kusoo aadeyso, iayadoo Jabhadda buurta Gacan-Libaax ay ku gacan seertay go’aankii Somaliland oo dhowaan shaacisay inay cafis u fidineyso, haddii ay hubka dhigto.

Xubno u hadlay jabhadda ayaa ku goodiyay in ay sii wadi doonaan halgankooda, isla-markaana waxa ay wacad ku mareen inay aysan dhigi doonin hubka.

Jabhadda Buurta Gacan Libaax saldhigga ka dhigatay ee u badan beesha Garxejis Isaaq ayaa diidan muddo kororsiga madaxweyne Muuse Biixi loo sameeyey, qabasho la’aanta doorashada iyo inaan loo sineyn Somaliland.

Si kastaba, Somaliland ayaa waxaa arrintaan usii dheer xaalado is biirsaday, sida dagaalka ka socda magaalada Laascaanood iyo muranka hareeyay doorashooyinka maamulkaasi.

The post Jabhadda buurta Gacan-Libaax oo afduub kale ka gaysatay Somaliland appeared first on Caasimada Online.