Soomaalida iyo Oromada oo Ku Dagaalamaya Qeybo Kamid ah Dowlad Deegaanka

[Deeq A.]

Wararka naga soo gaarayo Dowlad degaanka Soomaalida ayaa sheegaya in dagaal culus ka bilowday meel u dhaw xerada barakacayaasha Qollaji ee degaanka Soomaalida, dagaalkan ayaa u dhaxeeya Ciidamada Maleeshiyada degaanka Soomaalida iyo Ciidamada Oromiya, kaas oo aad u xooggan.

Dagaalka ayaa qarxay kadib markii Ciidamada Oromiya weerar kusoo qaadeen bar kantarool oo Soomaalidu leedahay oo ku yaal duleedka xerada barakacayaasha Qollaji, halkaas oo dhawaan xukuumadda degaanka Soomaalidu ka samaysay bar kantarool oo Jaadka lagu canshuuro.

Dagaalkan oo socday saacado badan ayaa waxa uu ku fiday goobo ay kamid yihiin buurta dhinaca ka xigta Qollaji, jidka laamida dhinaca xigta degaanka Oromiya iyo goobo kale, waxaana lagu soo waramayaa in xaaladda ay tahay mid aad u adag waxaana jira khasaare soo gaaray kala gaaray dhinacyada.

Ujeedka dagaalkan maanta ayaa sida wararku sheegayaan waxa uu daba socday barta kantarool ee Soomaalidu dhawaan ka samaysay duleedka xerada barakacayaasha Qollaji ee degaanka Soomaalida halkaas oo ay ka cadhoodeen Oromadu, majiro hadal ka soo baxay dowladda federalka Itoobiya oo ku aadan dagaalka.

Qollaji ayaa waxaa deggan dad barakacayaal ah oo Soomaali ah, kuwaas oo kasoo barakacayay colaadihii kala duwanaa ee horey usoo dhex maray Soomaalida iyo Canfarta, waxayna goobtani salka ku haysaa buuraha waawayn ee ay caanka ku tahay degaanka Baabili.

Goobjoog News

Source: goobjoog.com