Dhabancad oo hal sabab uga haray diyaaraddii soo qaaday dhaawacyada

[Deeq A.]

Dhuusamareeb (Caasimada Online) – Xildhibaan Cabdisalaan Xaaji Axmed (Dhabancad) oo ka tirsan Golaha Shacabka ayaa weli ku sugan jiidda hore ee dagaalka, wuxuuna kamid ahaa madaxdii ay waxyeelada faduud kasoo gaartay weerarkii todobaadkan ka dhacay deegaanka Laas-gacmey, kadib markii qarax lagu weeraray isaga, Qoor Qoor iyo Cabdi Qaybdiid

Dhabancad oo wareysi gaar ah siiyay Telefishinka Universal ayaa ka hadlay sababihii uu uga haray diyaaraddii loo diray dhaawacyada ee soo qaaday madaxweynaha dowlad goboleedka Galmudg iyo Senator Cabdi Qaybdiid, wuxuuna sheegay inay ahayd inuu ka dhabeeyo ujeedka uu u tegay Galmudug oo ah xoreynta deegaanada ay joogaan Shabaab.

“Waxaan uga haray howshii aan u imid oo qabyo ah inaan ka tegin, illaa inta aan ka gaareyno meeshii aan u soconay oo ah xoereynta gobolka Mudug” ayuu yiri Dhabancad.

Sidoo kale wuxuu sheegay in haatan ay wanaagsan tahay xaaladdiisa, isla-markaana aysan jirin khatar weyn oo uu hadda wajahayo, marka laga reebo nabaro yar oo ku yaallo.

“Nabarada igu yaallo kuwa khatar ah uma eka, mana u arkin inaan raaco diyaaraddii dhaawacyada loo soo diray” ayuu hadalkiisa sii raaciyay xildhibaanku.

Waxaa kale oo uu intaasi kusii daray inuu hadda gaaray ujeedkii uu u tegay Galmudug oo uu ku sheegay inay ahayd inuu booqdo magaalada Bacaadweyne oo xor ah, wuxuuna kamid mas’uuliyiintii u horreysay ee tegtay, kadib markii shalay la qabtay magaaladaasi.

“Ujeedadii aan usoo baxay waxay ahayd inaan tego Bacaadweyne, ilaaheyna waa noo rumeeyay oo waan tegnay annaga oo nabad ah, waana xorowday” ayuu mar kale yiri.

Galmudug ayaa waxaa hadda ka socda guluf dagaal oo ka dhan ah Al-Shabaab, kaas oo ujeedka uu yahay in laga tir tiro guud ahaan gobollada dhexe ee dalka.

The post Dhabancad oo hal sabab uga haray diyaaraddii soo qaaday dhaawacyada appeared first on Caasimada Online.