Itoobiya oo beenisay in Alshabaab 167 askari kaga dishay gudaha Soomaaliya

[Deeq A.]

Dowladda Itoobiya ayaa waxba kama jiraan ku tilmaantay sheegashada maleeshiyaadka AS  ee ah in ay 167 askari ka dishay millatariga Itoobiya.

Kooxda AS ayaa bayaan ay soo saartay ku sheegtay in ay ku dishay 167 askari oo Itoobiyaan ah weerar shalay ka dhacay gobolka Bakool ee Koonfur Galbeed Soomaaliya.

Waxaase sheegashadaas beeniyay safiirka Itoobiya ee Soomaaliya Mukhtaar Maxamed Waare oo wareysi gaar ah siiyay laanta Af-Soomaaliga ee VOA-da.

“Waa ay isku dayi karaan in ay weeraraan ciidamada Itoobiya balse xitaa 10 daqiiqo rasaas kuma ridi karaan ciidamada difaaca Itoobiya”ayuu yiri safiirka.

“Ciidankani waa kuwo xirfad leh; waa mid aad u qalabaysan, aadna u abaabulan, mar walbana si adag ayay u garaacaan marka ay timaado Shabaab” ayuu sii raaciyay.

Itoobiya ayaa kumanaan askari usoo dirtay Soomaaliya kuwaasi oo qeyb ka ah howlgalka ATMIS, iyo ciidamo kale oo Soomaaliya ku jooga heshiisyo ay la gashay dowladda.

PUNTLAND POST

The post Itoobiya oo beenisay in Alshabaab 167 askari kaga dishay gudaha Soomaaliya appeared first on Puntland Post.