La-taliyaha madaxweynaha oo farriin u diray shaqsiyaad kasoo horjeeda dagaalka

[Deeq A.]

Muqdisho (Caasimada Online) – Dr. Cabdiraxmaan Cabdullahi Baadiyow oo ah La-taliyaha Arrimaha Dastuurka ee Madaxweynaha Soomaaliya ayaa farriin culus u diray “kuwa afka ku taageera kooxda Al-Shabaab” ee kasoo horjeeda dagaalka socda.

Dr. Baadiyow ayaa shaqsiyaadka hadalada iyo qoraalada ku taageera Al-Shabaab ku tilmaamay kuwa jahwareerinaya guulaha ciidanmada qaranka ay ka gaareen dagaalka lagula jiro kooxda.

Shaqsiyaadkan ayaa inta badan isticmaala baraha bulshada, ayaga oo buun-buuniya khasaaraha soo gaaray ciidanka, iyo weerarada kooxda ku qaado xeryaha ciidanka, xilli lagu jiro dagaal.

Dr. Cabdiraxmaan Baadiyow ayaa qoraal uu soo dhigay bartiisa X (ex-Twitter) wuxuu ugu baaqay shaqsiyaadkas inay arkaan guulaha istaraatiijiga ah ee la gaaray, islamarkaana aysan ku mashquulin waxyaabaha ka dhaca goobaha dagaalka oo isriix-riix ka dhacdo maraka qaar, taasi oo ah xeeladaha dagaalka.

“Waxaan leeyahay kuwa khaladka kaliya arka ee aan arkin saxda, kuwaas oo aan kala saari karin guusha iyo guul-darada, dhacdooyinka goobaha dagaalka waxaan leeyahay waad fashilanteen ee Alle ka xishooda hadaa umada Soomaaliyeed iyo Qaranka hadaa ka xishoon waysaan, waxa aad qoraysaan ogaada in ay yihiin wax aan la hilmaami doonin,” ayuu yiri Dr. Cabdiraxmaan Cabdullahi Baadiyow.

Qoraalka La-taliyaha Arrimaha Dastuurka ee Madaxweyne Xasan Sheekh ayaa imanaya xilli maalmihii la soo dhaafay la sheegay inay soo badanayaan shaqsiyaadka dhinaca kale u fasira guulaha ay gaaraan ciidamada Qaranka iyo kuwa deegaanka, iyo guud ahaan howl-gallada ka dhanka ah kooxda Al-Shabaab.

Si kastaba, Dagaalka socda ayaa waxay ciidamada dowladda iyo kuwa deegaanka casharo la taaban karo ugu dhigeen dagaal-yahaanada Al-Shabaab, ayada oo kooxda laga xoreeyay deegaano iyo degmooyin muhiim ah, oo sanado badan ku jiray gacantooda.

Cabdixkiin Cilmi Xasan
Nairobi, Kenya 

The post La-taliyaha madaxweynaha oo farriin u diray shaqsiyaad kasoo horjeeda dagaalka appeared first on Caasimada Online.