Agaasimeyaal Cusub oo loo Magacaabay Laamaha Dakhliga ee Maaliyadda oo Xilkii la Wareegay

[Deeq A.]

Agaasimeyaal Cusub oo loo Magacaabay Laamaha Dakhliga ee Maaliyadda oo Xilkii la Wareegay

Hargeysa(Qaran news)- Masuuliyiinta wasaaradda maaliyadda ayaa xilalkii u kala wareejiyey agaasimeyaal cusub oo loo magacaabay waaxyaha dakhliga Kastamada iyo Cashuuraha Berriga.
Agaasimaha Guud ee Maaliyadda Mr. Maxamed Xuseen (Mu’adinka) oo hadal ka jeediyey munaasibadii xilwareejinta ayaa sheegay in Agaasimahii hore ee Kastamada aan xil-gudasho la’aan loo bedelin balse la nasiyey.

Agaasimahii hore ee Kastamada khalad uu sameeyey xilka loogama qaadin, balse shaqo fiican ayuu qabtay, imikana waa la nasiyey, berrina xil ka muhiimsan ayuu qaban doonaa.

Mr. Mu’adinka ayaa sidoo kale sheegay in agaasimaha cusub ee Kastamadu aanu shaqada ku cusbayn, balse hore waaxyaha dakhliga ka soo shaqeeyey, imikana ku-xigeenka Cashuuraha Berriga ahaa.

Agaasimaha Guud ee Maaliyadda Md. Maxamed ayaa uugu baaqay waaxyaha dakhliga inay wada jir u hawlgalaan sidii qoys.

Munaasibada ayaa xilalkii loogu kala wareejiyey masuuliyiintii cusbaa ee loo kala magacaabay.

Qaran News