Xasan oo saxiixay sharci muhiim ah oo kasoo gudbay BF

[Deeq A.]

Muqdisho (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa saxiixay sharciga Hanti-dhawrka Qaranka.

Saxiixa sharcigan oo ay baahisay Villa Somalia, ayaa waxaa lagu sheegay in madaxweynaha uu qaaday tallaabadan isaga oo ka duulaya xaqiijinta Soomaaliya ku shaqeysa shuruuc iyo xeerar qoran.

Sharciga cusub ee Hanti-dhawrka guud ee Qaranka ayaa la jaanqaadaya shuruucda maareynta maaliyadda guud, sharciga iibka iyo qandaraasyada qaranka iyo shuruucda kale ee hufnaanta iyo horumarinta maamulka hantida qaranka

Madaxeynaha Xasan Sheekh Maxamuud ayaa u mahad-celiyay guddoonka Golaha Shacabka iyo Aqalka Sare, Xildhibaannada iyo quburadii kasoo shaqeeyey sharcigan.

Marxaladihii uu soo maray sharcigaan

Xildhibaanada Golaha Shacabka ayaa 16-kii August ansixiyey hindise-shaciyeedka Hanti-dhawrka Qaranka, kaasi oo ay goluhu mariyeen saddex akhrin, sida uu qabo xeer hoosaadkoodu.

Sharcigan oo ay horay usoo meel-mariyeen Golaha Wasiirada ayaa waxaa muddo ka doodayay xubnaha baarlamaanka oo iyaguna ugu dambeyntii bartimihii August doodooda soo gaba-gabeeyay.

Guddoomiye ku-xigeenka labaad ee Golaha Shacabka, Cabdullaahi Abshirow oo shaaciyay natiijada codeynta ayaa ku dhowaaqay inuu ansax yahay sharciga Hanti-dhawrka Qaranka.

Xildhibaanada markaas oggolaadey sharcigan ayaa ahaa 135 Mudane, halka ay diideen 3 Mudane, waxaana ka aamusay 4 Mudane, sida uu xilligaas sheegay guddoomiye ku-xigeenka labaad Cabdullaahi Abshirow oo fadhigaas shir-guddoominaayey.

Si kastaba, Golaha Shacabka ee Baarlamaanka Federaalka ayaa muddooyinkii dambe dardar ku waday sharciyada loo soo gudbiyay, inkasta oo guddoonka inta badan lagu eedeeyo in uu hab baalmarsan sharciga u maro socod-siinta sharciyada qaarkood, taasi oo mararka qaar buuq ka rida fadhiyada golaha.

The post Xasan oo saxiixay sharci muhiim ah oo kasoo gudbay BF appeared first on Caasimada Online.