Somaliland oo shaacisay in Fu’aad Shongole iyo 600 oo dagaal-yahan ay soo galeen…

[Deeq A.]

Hargeysa (Caasimada Online) – Dowladda Somaliland ayaa sheegtay inay xaqiijisay in ka badan 600 oo dagaal-yahan, oo uu hoggaaminayo Fu’aad Maxamed Qalaf (Shongole), oo ka mid ah horjoogeyaasha Al-Shabaab, ay soo galeen magaalada Laascaanood labadii maalin ee ugu dambeysay.

“Tani waxay walaac sii kordhaya ku abuurtay mas’uuliyiinta iyo muwaadiniinta,” ayaa lagu yiri qoraal kasoo baxay Wasaaradda Arrimaha Dibedda Somaliland. 

“Ilo xog-ogaal ah ayaa sheegay in ujeedka socdaalka Shangole uu yahay sidii maleeshiyaadka degaanka loogu tababari lahaa diyaarinta walxaha qarxa iyo sidii Al-Shabaab saldhig uga sameysan laheyd buuraleyda Ceerigaabo ee gobolka Sanaag.” 

Wasaaradda Arrimaha Dibedda Somaliland ayaa sheegtay in bilihii ugu dambeeyey magaalada Laascaanood “ay la kulantay kororka weerarada, dadaallada qorista maleeshiyaadka iyo faafinta dacaayadaha xagjirnimada.” 

“Dhaq-dhaqaaqyadan waxay carqaladeynayaan dadaallada ay dowladda iyo ciidamada ammaanku ku doonayaan in ay ku ilaaliyaan ammaanka iyo kala dambeynta deegaanka. Kor u kaca dhacdooyinka rabshadaha wata iyo fikradaha xagjirka ah waxay khatar weyn ku yihiin nabadda iyo xasilloonida Somaliland iyo guud ahaan gobolka,” ayey tiri.

Somaliland ayaa sheegtay inay horey walaacyadeeda ugu gudbisay beesha caalamka iyo hay’adaha kala duwan ee amniga ee gobolka, maadaama dhacdooyinkan, ayey tiri, ay halis gelinayaan nidaamka bulshada.

“Sare u kaca dhaq-dhaqaaqyada xagjirka ah ma saameynayaan kaliya amniga Laascaanood balse waxa ay sidoo kale ku fidi karaan gobollada deriska ah, taas oo sii xumaynaysa xasilloonida deegaanka,” ayaa lagu yiri war-saxaafadeedka Wasaaradda Arrimaha Dibedda Somaliland.  

“Waxaa socda dadaallo lagu xoojinayo xog ururinta, xoojinta amniga xuduudaha, iyo hagaajinta isku xirka hay’adaha amniga si looga hortago khatarta Al-Shabaab iyo kooxaha kale ee xagjirka ah.” 

Somaliland ayaa ugu bqqday beesha caalamka, dalalka deriska ah, iyo ururada gobolka ee ay khusayso inay gacan ka geystaan la-dagaalanka “argagixisada iyo xagjirnimada” Laascaanood.   

Maamulka la baxay SSC-Khaatumo ee dhowaan looga dhowaaqay Laascaanood ayaa wax kama jiraan ku tilmaamay warka kasoo baxay Somaliland. 

Somaliland ayaa dabayaaqadii August looga adkaaday dagaalkii Laascaanood, ayada oo laga qabsaday saldhigga Gooja-Cadde. Wixii markaa ka dambeeyey waxay wadday abaabul dagaal, ayada oo ciidamo soo dhoobtay aagga.

The post Somaliland oo shaacisay in Fu’aad Shongole iyo 600 oo dagaal-yahan ay soo galeen… appeared first on Caasimada Online.