Dhageyso: Qisada Hooyo Cabdiyo iyo wiilasheeda ku kaliftay inay Shabaab la dagaalamaan

[Deeq A.]

Maxaas (Caasimada Online) – Baraha bulshada waxaa maanta aad loogu faafiyey haweeney waayeel ah oo ka tirsan ciidanka Macawiisley ee dagaalada adag Al-Shabaab kula galay gobolka Hiiraan, gaar ahaan Macawiisleyda beesha Xawaadle.

Hooyadaan oo magaceeda lagu soo koobay Cabdiyo ayaa hadda ku sugan degmada Maxaas ee gobolka Hiiraan oo abaabulkii ugu cuslaa uu ka socdo, waxayna ka sheekeysay halgan dheer oo ay soo gashay, goortii ay soo bilowday iyo sababta ku kaliftay inay qoriga qaadato.

Maamo Cabdiyo oo la hadashay Telefishinka Qaranka Soomaaliyeed ayaa sheegtay inay qoriga qaadatay maalintii Al-Shabaab ugu yaraan 30 qof iyo 10 gaadiid ah ku gubeen inta u dhaxeysa Maxaas iyo Beledweyne, ilaa hadana ay sidii u dabajoogto.

“Waxay naga dileen wiilal haldoor ah, ceelashii biyaha ayey naga duugeen, markii dambana dadkii iyo gaadiidkii ayey naga gubeen, maalintaas ayaan qoriga qaatay, waxaan ku biiray Macawiisley, waxaana ka qeyb galay dhamaan dagaaladii gobolkaan looga xoreeyey Khawaarijta, TV-ga ayaana ka soo muuqa jirin maahane maalin kama bixin dagaalka,” ayey tiri Maamo Cabdiyo.

Waxay sheegtay inay ka qeyb gashay dhamaan dagaaladii ka dhacay gobolka Hiiraan, hadana ay doonayaan inay wax ka xoreeyaan deegaanada ay degaan beelaha kale, maadaama ay dhulkoodii ka xoreysteen kooxda.

“Khawaarijta dhulkeena waan ka xoreysanay, waxay heystaan beesha Murusade, Madaxweynihii ayaa noo yimid oo naga codsaday inay deegaanada haray wax ka xoreyno, hadii aana dhiman inta Khawaarij mid ka noolyahay kama hari doono,” ayey tiri Cabdiyo.

Hooyo Cabdiyo waxay sheegtay in dagaalka ay kula jiraan shan wiil oo ay dhashay 10 kale oo ayada la dhalatay, sidoo kale markii lagu daro dadka kale ee qaraabada la ah waxay sheegtay inay 40 qof gaarayaan.

“Dhamaan ehelkeyga waa ku jiraan halgankaan, shan aan dhalay iyo ilaa 40 kale ayaa dagaalka igula jirta, qabiilkeena kore dhowr kun oo qof ayaa maanta diyaar u ah dagaalka, waxaana rabnaa inaan Murusade la tagno Wabxo ilaa Ceelbuur,” ayey hadalkeeda ku sii dartay Hooyo Cabdiyo.

Hoos ka dhageyso wareysiga

The post Dhageyso: Qisada Hooyo Cabdiyo iyo wiilasheeda ku kaliftay inay Shabaab la dagaalamaan appeared first on Caasimada Online.