Xawaadle oo abaabul dagaal ka bilaabay Maxaas – Muxuu yahay qorshaha socda?

[Deeq A.]

Maxaas (Caasimada Online) – Abaabul culus oo ka dhan ah kooxda Al-Shabaab ayaa ka bilowday degmada Maxaas ee gobolka Hiiraan, halkaas oo maanta uu ka dhacay isku soo bax aad u weyn.

Masuuliyiinta iyo waxgaradka beesha Xawaadle ayaa isugu tegay degmada Maxaas, kuwaas oo sheegay inay bilaabayaan duulaan ka dhan ah kooxda Al-Shabaab.

Madaxweyne ku xigeenka HirShabeelle Yuusuf Dabageed, guddoomiyihii hore ee gobolka Hiiraan Cali Jeyte, xildhibaano heer federaal ah, masuuliyiin iyo waxgarad kale ayaa isugu yimid isku soo bixii maanta ka dhacay Maxaas.

Guddoomiye Cali Jeyte oo ka hadlay ayaa sheegay in dagaalka Al-Shabaab seddax markii loo dhigo hal dhig uu ka haray, waxayna reer Hiiraan maanta isku dhaarsadeen inay qaadaan duulaan culus oo Shabaab ay ku soo afjarayaan.

Madaxweyne ku xigeenka HirShabeelle Yuusuf Dabageed oo halkaas ka hadlay ayaa isna balan-qaaday in xoogooda ay isugu geynayaan dagaalka Al-Shabaab.

“Wixii khilaaf ah aan dhinac iska dhigno dagaalka aan u soo jeesano, cidii nagu kaalmey kartana waan rabnaa, dagaal adag ayaan soo marnay oo qofba kaalin ku lahaa, maanta dhameystirkii ayaa noo haray,” ayuu yiri Yuusuf Dabageed.

Abaabulkaan ay maanta muujiyeen reer Maxaas ayaa ku soo aadaya iyadoo dhawaan uu magaaladaas tegay Madaxweyne Xasan Sheekh oo beesha Xawaadle iyo xoogaggii kale ee martida u ahaa ka dalbaday inay dagaalka galaan, si looga adkaado argagixisada.

Degmada Maxaas oo ku taalla halka ay iska galaan gobollada Hiiraan iyo Galgaduud, sidoo kale u dhow xadka gobolka Sh/Dhexe ayaa muhiim u ah abaabulka dagaal ee la doonayo in Shabaab looga xoreeyo magaalooyin muhiim ah oo Ceelbuur ay ugu horeyso.

The post Xawaadle oo abaabul dagaal ka bilaabay Maxaas – Muxuu yahay qorshaha socda? appeared first on Caasimada Online.