Cali Jeyte oo faah-faahin ka bixiyay heshiiskii Xasan Sheekh iyo Xawaadle ee MAXAAS

[Deeq A.]

Beledweyne (Caasimada Online) – Guddoomiyihii gobolka Hiiraan Cali Jeyte Cismaan ayaa faah-faahin ka bixiyay heshiiskii dhawaan ay degmada Maxaas ay ku gaareen Xasan Sheekh iyo beesh Xawaadle.

Cali Jeyte oo haatan ah hoggaamiyaha maamulka la baxay Hiiraan State ayaa sheegay in madaxweyne Xasan iyo qeybaha kala duwan ee beesha Xawaadle ay isla qaateen in xilligaan dib loo dhigo wixii tabasha ah.

“Madaxweynaha dowladda fedeaalka iyo qeybaha kala duwan ee beesha Xawaadle waxay ka wada-hadleen laba arimood kaliya oo kala ahaa in la galo dagaalka kooxda Al-Shabaab ka dhanka ah iyo in dib loo dhigo wixii tabasho ah ee jira,” ayuu yiri Cali Jeyte.

Waxa uu sheegay in madaxweynaha la qaateen arrinkaas, islamarkaana ay ka tanaasulin tabashadood, ee dib ugu dhigayaan sidii dalka cadowga looga xoreyn lahaa, sida uu yiri.

“Madaxweynaha wuxuu naga dalbaday inaan wixii tabasho ah an dib u dhigano oo marka hore cadawga dalka aan ka wada xureyno waana isla qaaday taas, sababto ah dal nabdoon iyo meel nabad ah ayaa wax walba lagu xalin karaa marka wixii tabasho ahaa lagama tanaasulin ee xaaladaha jira dartood ayaa dib loogu dhigay.”

Jeyte ayaa sidoo kale waxa uu bulshada gobolka iyo guud ahaan dadka Soomaaliyeed ugu baaqay in loo midoobo dagaalka Al-Shabaab, sidii dalka looga ciribtiri lahaa kooxdan, oo wejiga koowaad ee dagaalka looga xoreeyay deegaano badan.

“Al sheydhaan waa laga guuleysan kara oo waxad ogtihiin Soomaaliya oo inta ay maanta tahay ciidan ahaan iyo dad ahaan ka yar ayaa Itoobiya kaga guuleysatay dagaalkii 1977-dii aan la galnay, marka hada oo dad ahaan iyo ciidan ahaan ka badanahay maxa diidaya in aan cadawgan diinta ka been sheegaya iska dulqaadno, dagaalkan waa mid Soomaali oo dhan looga baahan yahay ee maahan mid dad gaar ah looga baahan yahay.”

Gobolka Hiiraan ayaa waxaa markale ka socda dardar-gelinta dagaalka kooxda Al-Shabaab ka dhanka ah, iyada oo beesha Xawaadle markii hore hormuud u aheyd dagaallada haatan lagula jiro kooxda.

Si kastaba, heshiiska cusub ee madaxweyne Xasan Sheekh iyo beesha Xawaadle ayaa meesha ka saaraya xiisaddii ka taagneyd Beledweyne ee ka dhalatay beddalka Cali Jayte oo ay ku kala tageen reer Hiiraan iyo HirShabeelle, si awoodda la iskugu geeyo dagaalka socda.

The post Cali Jeyte oo faah-faahin ka bixiyay heshiiskii Xasan Sheekh iyo Xawaadle ee MAXAAS appeared first on Caasimada Online.