Olol Cali Guuleed, Shuuke Cali Dheeg iyo Ciise Barre oo howlga lagu dilay

[Deeq A.]

Dhuusamareeb (Caasimada Online) – Dowladda Soomaaliya ayaa faah-faahin ka bixisay howlgal culus oo ay iska kaashaadeen ciidamda Xoogga dalka iyo kuwa dadka deegaanka, kadib markii ay weerar ku qaadeen AlShabaab ku sugnaa qaybo kamid ah Galgaduud.

Howlgalkan oo ahaa mid culus ayaa si gaar ah uga dhacay duleedka deegaanka Ceel-La Helay oo ay shalay uun la wareegeen ciidamada dowladda iyo kuwa dadka deegaanka.

Warsaxaafadeed ka soo baxay dowladda federaalka Soomaaliya ayaa waxaa lagu sheegay in howlgalkaas lagu dilay saddex horjooge oo ka tirsanaa Shabaab, kuna sugnaa halkaasi.

“Howlgal gaar ah oo ay fuliyeen Ciidanka Qaranka iyo Ciidamada Difaaca Shacabka ayaa lagu dilay saddex horjooge oo mas’uul ka ahaa falalka diinta ka baxsan ee Khawaarijta ka fulin jireen Galmudug” ayaa lagu yiri qoraal ka soo baxay wasaaradda warfaafinta.

Magacyada saddexda sarkaalka ee duqeynta lagu dilay ayaa lagu kala sheegay Olol Cali Guuleed oo ahaa madaxii abaabulka jabhadaha Al-Shabaab, Shuuke Cali Dheeg iyo Ciise Barre oo iyaguna kamid ahaa xubno ay sheegtay inay baadi-goobeysay dowladda dhexe.

“Howlgalka oo ahaa mid si xirfadaysan loo qorsheeyay loona fuliyay waxa uu dhabarka ka jabiyay guud ahaan Khawaarijta gaar ahaan kuwa ku dhuumaalaysanaya Galmudug” ayaa mar kale lagu yiri warsaxaafadeedka ka soo baxay dowladda federaalka Soomaaliya.

Sidoo kale dowladda Soomaaliya ayaa u mahad-celisay dadka deegaanka oo ay sheegtay inay gacan ka gaysteen fududaynta howlgalkaas khasaaraha lagu gaarsiiyay Al-Shabaab.

Waxay kale dowladdu intaasi ku dartay inay sii wadeyso howlgalada ka dhanka ah xubnaha Al-Shabaab ee ku sugan deegaanada maamulka Galmuudg oo ay hadda ka socdaan howlgallo xoreyn ah oo ay iska kaashanayaan ciidanka dowladda iyo kuwa deegaanka.

“Waxaa ka go’an dowladda oo kaashanaysa shacabka Soomaaliyeed in la ciqaabo dhagar qabeyaasha Khawaarijta ah ee ku dhiirran falalka shacabka iyo dalka lagu dhibaateynayo, isla markaana ka dhaga adayga in ay ka haraan fikirka iyo ficilada Khawaarijta” ayay tiri.

Si kastaba, Galmudug ayaa waxaa haatan ka socda howlgallo xoreyn ah oo uu horkacyo madaxweyne Xasan Sheekh Maxamuud oo haatan ku sugan jiidda hore ee dagalka.

The post Olol Cali Guuleed, Shuuke Cali Dheeg iyo Ciise Barre oo howlga lagu dilay appeared first on Caasimada Online.