Madaxweyne Xasan oo guddoomiyay shir ka dhacay Aadan Yabaal + Sawirro

[Deeq A.]

Aadan Yabaal (Caasimada Online) – Madaxweynaha dowladda federaalka ah ee Soomaaliya, Mudane Xasan Sheekh Maxamuud oo weli ku sugan degmada Aadan Yabaal ee gobolka Shabeelaha Dhexe ayaa kulamo xasaasi ah ka wada degmadas oo dhowaan uun laga fara maroojiyay kooxda Al-Shabaab oo muddo dheer ku sugneyd halkaasi.

Madaxweynaha ayaa maanta guddoomiyay shir uu isugu yeeray hogaannada taliska Ciidanka Xooga Dalka Soomaaliyeed, si loo xaqiijiyo qorshaha dalka looga xoreynayo Al-Shabaab.

Kualnka waxaa ka qayb galay Taliyaha Ciidanka Xoogga dalka Soomaaliya Sarreeye Guuto Ibraahim Sheekh Muxudiin, Taliyaha Ciidanka Lugta ee Ciidanka Xoogga dalka Soomaaliya Sarreeye Guuto Axmed Aadan Cali iyo hoggaannada kala duwan ee Ciidanka Xoogga dalka Soomaaliyeed.

Ugu horreyn madaxweynaha ayaa warbixino ka dhageystay saraakiisha uu la kulmay, kuwaas oo la wadaagay qorshahooda ku aadan sidii Al-Shabaab looga saari lahaa dalka oo dhan.

Xasan Sheekh ayaa dhankiisa adkeeyay sida naf-hurnimada iyo geesinimada leh ee ay habeen iyo maalin ugu taagan yihiin difaaca qaranka, gaar ahaan dagaalka ay kula jiraan Al-Shabaab.

Sidoo kale madaxweynaha ayaa tilmaamay in dowladdu ay qorshe cad ka leedahay
dhammeystirka baahiyaha ciidanka iyo dalacsiintooda, waxa uuna saraakiisha iyo guud ahaan ciidanka kula dardaarmay in ay xoojiyaan doorkooda si looga guuleysto xubnaha kooxda Al-Shabaab.

Waxaa kale oo uu intaasi kusii daray in dowladda federaalka ay ka go’an tahay inay hanato amniga dalka oo dhan, maadaama ay sii baxayaan ciidamada howlgalka ATMIS.

Shirkan ayaa qayb ka ah dadaallada uu madaxweynaha ka wado jiidda hore ee dagaalka, isaga oo horay ula shiray waxgaradka deegaanka oo uu kala hadlay doorkooda ku aadan dagaalka Al-Shabaab.

Madaxweynaha Soomaaliya ayaa muddo ka badan bil ku maqan jiidda hore ee dalka, isaga oo tegay magaalooyinka Dhuusamareeb iyo Maxaas, wuxuuna sidoo kale hadda joogaa degmada Aadan Yabaal oo kamid ah meelaha ay ka socdaan howlgallada dib u xoreynta dalka.

The post Madaxweyne Xasan oo guddoomiyay shir ka dhacay Aadan Yabaal + Sawirro appeared first on Caasimada Online.