Dalka Kenya oo doonaysa inay qaadkeeda u iibgeyso Israa’iil

[Deeq A.]

Beeraleyda qaadka ama Miraa ee kenya ayaa suuq cusub oo qaadka ay geeyaan ka helay bariga dhexe ka dib markii ay waayeen mid ka mid ah labadii suuq ee ugu weynaa baayac cmushtarkooda.

Ganacsatada qaadka ayaa bilaayiin Shilin ka heli jiray UK iyo Soomaaliya oo ahaa labadii suuq ee ugu weynaa. UK ayaa dalkeeda ka joojisay qaadka iyadoo ku dartay 2014-kii in uu ka mid yahay maandooriyayaasha, halka Soomaaliyana ay xayiraad saartay inkastoo hadda la qaaday.

Beeraleyda, ganacsatada iyo hoggaamiyayaasha Meru ayaa hadda si weyn u raadinaya suuqyo hor leh ka dib markii ay sheegeen in ay casharo ka barteen markii ay joojisay Soomaaliya oo ay si weyn ugu tiirsanaayeen.

Ururka beeraleyda iyo ganacsatada iyo guddoomiyahooda Kimathi Munjuri ayaa la filayaa in ay Tel-Aviv ku soo bandhigaan ganacsigooda bishan September.

Mr. Munjuri wuxuu sheegay in ay ka qeybgalayaan bandhigga Agro Mashow ee Israel kaas oo ay geynayaan dalagyo kala duwan.

Ku simaha agaasimaha guud ee hay’adda beeraha Kenya Willis Audi ayaa sheegay in Israel ay tahay meel muhiim ah oo wax soo saarka beeraha Kenya loo dhoofin karo. Kenya ayaa muddo dheer u dhoofin jirtay Israel qaxwaha, shaaha iyo ubaxa.

Markii dib loo furay qaadka tagi jiray Soomaaliya waxaa la filayay in uu kor ku kaco balse beeraleyda qaadka iyo ganacsatada waxay sheegeen in ay sidaan noqon.

qaadka ugu badan ee laga cuno Israel waxaa uu uga yimaadaa Ethiopia, waana suuq weli la geyn karo noocyada kale ee qaadka.

Yaa isticmaala qaadka laga cuno Israel
khat
XIGASHADA SAWIRKA,AFP
Inkastoo dalal badan oo reer galbeed ah uu sharci darro ka yahay qaadka hadana ma jiraan wax xannibaad ah oo ku saabsan iibinta ama qeybinta gudaha Israel.

Ganacsato badan ayaa u arka in ay tahay fursad ay khaatkooda ku geyn karaan suuq cusub oo weli la geyn qaadka Kenya.

Maadama qaadka laga ogol yahay Israel ayaa waxaa dhacday in dad badan oo haysta dhalashada Isreal lagu xiro meelaha aan laga ogoleyn sida dalalka reer galbeedka.

Qaadka Isreal la geeyo waxaa cuna inta badan Yahuudda ka timid Yemen waxayna ugu dhawaaqaan “Gat”, inta badan waxay cunaan xiliyada ay nasanayaan.

Qaadka waa laga ogol yahay Isreal hadii aad caleemahiisa cuneyso balse waa sharci darro hadii aad badasho oo walxaha ku jiro ka soo saarto.

Sanadkii 2012-kii ayey Isreal ku dhawaaqday in uu sharci darro yahay cabitaan laga sameeyay qaadka, waxayna ku tilmaameen in uu yahay maandooriyaha ugu khatarsan.

bbcsomali

Qaran News