Ra’isal Wasaaraha ku xigeenka Dalka oo Xarigga Ka Jaray Xarunta Hay’adda Maaraynta Musiibooyinka

Deeq A. · August 16, 2023

Ra’isal Wasaaraha ku xigeenka Dalka Mudane Saalax Jaamac ayaa maanta xarigga jaray Xarunta Dhexe ee Hay’adda Maaraynta Musiibooyinka Soomaaliyeed ee SODMA.

Sanadkii hore bishii Agoosta ayey dowladda Soomaaliya dib u hawlgalisay Hay’adda Maaraynta Musiibooyinka Soomaaliyeed si dalka looga badnaadiyo macluul iyo abaara baahsan oo dalka markaa ka jiray, hawlgalinta ka dib Gudoonka hay’adda SODMA Mudane Maxamud Macallin iyo Dr Axmed Abdi Aden iyo guud ahaan hawl wadeennada kala duwan ayaa isku hawlay ka hortagga iyo yaraynta qatarihii kala duwnaa ee Dalka soo wajahay ee arimaha macluusha, abaaraha iyo fatahaadaha.

Ra’isal wasaare ku xigeenka dalka oo ka hadlay munaasabadii xarig jarka xarunta dhexe ee SODMA ayaa bogaadiyay mudada kooban ee sanadka ah hawlaha baxadda leh ee ay hay’addu qabatay isagoo sidoo kale sheegay in wali ay sugayso hay’adda hawla baxaad leh madaama dalka uu ka socda dagaalka Qawaarijta lagula jiro.

Gudoomiye Maxamud Macallin oo ka hadlay munasabadda xarig jarka ayaa isagana ka shekeyay marxaladihii kala duwnaa ee ay soo martay hay’adda SODMA mudadii sanadka ahayd ee ay jirtay, isagoo sheegay markuu xilka la wareegay in hay’addu ay ku shaqayneysay xarun kiro ah, maantana ay SODMA dagantahay xarun dhexe oo ay iyadu leedahay.

Xafladda xarig jarka oo si heersare loo soo agaasimay ayaa waxaa ka soo qaybgalay Wasiirka Gargaarka iyo Arimaha Bini’adinmada KGS mudane Abdinasir Caruush, wakiillo ka socday hay’adda UNDP oo ah hay’adda dhistay xarunta SODMA, iyo Maamulka kala duwan ee Hay’adda.