Shir Lagu Darsayo Xisaab-xidhada Dawladaha Hoose oo lagu Qabtay Hargeysa

[Deeq A.]

Shir Lagu Darsayo Xisaab-xidhada Dawladaha Hoose oo lagu Qabtay Hargeysa

Hargeysa(Qaran news)-Hantidhowraha Guud ee Qaranka JSL Mudane Axmed Yuusuf Dirir oo uu Weheliyo Ku-xigeenka Hantidhawraha Guud ee Qaranka JSL Mudane Sacad Riiraash ayaa Furay Shir Hawleed ku saabsan Dib-u-eegista iyo Dar-dar Galinta Xisaab-xidhka Dowladaha hoose ee Sannadkii 2022 oo qayb ka ah Xisaab-xidhka Dawladda ee dhawaan Golaha Wakiilada Jamhuuriyadda Somaliland loo gudbin doono.

Shirka waxa ka soo qayb-galay masuuliyiinta Wasaaradda Horumarinta Maaliyada, Wasaaradda Arrimaha Gudaha iyo Xafiiska Xisaabiyaha Guud Ee Dowladda, oo kala ah Wasiir ku-Xigeenka Wasaaradda Horumarinta Maaliyada, Agaasimaha Guud ee Wasaaradda Horumarinta Maaliyada, Agaasimaha Guud ee Wasaarada Arrimaha Gudaha, Xisaabiyaha Guud Ee Dowladda, Xisaabiye Ku-Xigeenka Guud ee Dowladda iyo Agaasimayaasha Waaxyaha ee ay shaqadani khusaysay.

Gaba-gabadii shirka waxa la iskula qaatay in wixii qabyo ah la dhammaystiro, kulan danbena lala yeesho Wakaaladaha iyo Hay’adaha Dawladda ee macaashka sameeya.

Qaran News