Duqeyn lagu laayey Al-Shabaab oo galabta ka dhacday Ruun-nirgood

[Deeq A.]

Ruun-nirgood (Caasimada Online) –Howlgal lagu burburiyay fariisin ay lahaayeen maleeshiyaad ka tirsan Al-Shabaab ayaa galabta ka dhacay duleedka degmada Ruun-nirgood ee hobolka Shabeellada Dhexe.

Gadiid dagaal iyo Saanad Ciidan ayaa lagu burburiyey howlgalkaas oo ciidanka Qaranka oo kaashanaya saaxiibada caalamka ay galabta fuliyeen.

Deegaanka lagu magacaabo Sigato oo hoos taga degmada Ruun-nirgood ee Gobalka Shabeellada Dhexe.

Duqeyn ay geysteen diyaarado dagaal ayaa galabta fuliyey howlgalkaan, iyagoo beegsaday goob ay isku uruursaneysay kooxda Al-Shabaab.

“Howlgalkaan ayaa khasaaro xoog leh waxaa lagu gaarsiiyay danbiilayaasha Khawaarijta ahaa ee ku sugnaa goobta uu howlgalka ka dhacay,” ayaa lagu yiri qoraal lagu baahiyey warbaahinta dowladda inkastoo aan lagu shaacin tirada dagaalyahanada lagu dilay howlgalka.

Degmada Ruun-nirgood ee gobolka Shabeellada Dhexe iyo deegaano badan oo hoos taga waxaa weli jooga ama yimaada dagaalyahano ka tirsan kooxda Al-Shabaab.

Ciidanka dowladda oo weerarro culus kala kulmay Al-Shabaab markii ay qabsadeen Ruun-nirgood waxay sii joogi waayeen deegaankaas, iyagoo isaga soo baxay.

Maalmihii ugu dambeeyey duqeymaha ka dhacaya aagga Ruun-nirgood ayaa aad u badnaa, waxaana Jimcihii ugu yaraan 100 Shabaab ah lagu dilay aagga deegaanka Daarunicma oo degmadaas hoos taga, sidoo kale duqeyntaas waxaa Shabaab looga gubay ku dhawaad 10 gaari.

The post Duqeyn lagu laayey Al-Shabaab oo galabta ka dhacday Ruun-nirgood appeared first on Caasimada Online.