Daawo: Qoyska Xasan Sheekh oo toos loogu eedeeyey dhul-boobkii maanta

[Deeq A.]

Muqdisho (Caasimada Online) – Qoyska Madaxweyne Xasan Sheekh Maxamuud ayaa lagu eedeeyay dhul-boob ka socda degmada Xamarweyne ee magaalada Muqdisho, waxaana maanta la weeraray maqaayad caan ah oo lagu magacaabo Geel-doox.

Gabadha iska leh maqaayadaas oo lagu magacaabo Xaawo Geeldoox ayaa la hadashay warbaahinta, waxayna sheegtay inay jir-dileen ciidamo boolis ah oo loo soo diray.

Marwada Madaxweynaha Qamar iyo nin lagu magacaabo Ismaaciil Wardheere ayey sheegtay gabadhaasi ay ka socdeen ciidamada maanta ku soo weeraray maqaayadeeda.

“Madaxweyne Xasanow maalintii halkaan la idinku weeraray adiga iyo Madaxweyne Shariif waxaan ciidankaaga raashin ku siiyey si bilaash ah, balse maanta markii aad Madaxweyne noqotay waxaad iigu abaal-guday jir-dil iyo dhul-boob,” ayey tiri Xaawo Geeldoox oo ilmeyneysa.

Maqaayadda maanta laga burburiyey gabdhaan, iyada iyo shaqaalihii joogayna lagu jir-dilay waxay u dhaxeysaa isgoyska Shabeelle iyo Hotel Maa’ida oo ah hotelkii lagu weeraray Xasan Sheekh oo mucaarad ah.

“Xasan Sheekh dadka dhan ayuu madaxweyne u yahay, laakiin waxaan maanta u cabanaa dadka dowladaan igu metela, qoray ayaa maanta la iigu awood sheegtay, waxaana la igu liif-garaacay bistoolad,” ayey hadalkeeda ku sii dartay Xaawo Geeldoox.

Sida ay warbaahinta u sheegtay gabadhaan waxay ka cabaneysaa qoyska Madaxweynaha oo ku lugyeeshay dhul-boobka iyo awood sheegashada lagula kacay maanta, taas oo daaha ka rogtay eedeymo isisoo tarayey mudooyinkaan.

Magaalada Muqdisho waxaa hareeyey guuxa dadweynaha ka cabanaya dhul-boob ay ku kacayaan xigtada hoose ee Madaxweyne Xasan Sheekh, intii uu joogay xukunka dhul badan ayaa xoog looga saaray dadkii deganaa, iyadoo loo adeegsanayo ciidamada ammaanka.

Tani waxay imaaneysaa iyadoo Xasan Sheekh oo meel kasta ka sheegayo inuu la dagaalamayo musuqa iyo boobka xoolaha dadweynaha, balse waxay dadku is weydiinayaan, maxaa musuq ah? Hadii xigtada Madaxweynaha ay dul-hoganayaan eedeymo dhul-boob iyo awood sheegasho ah.

Hoos ka daawo cabashada Xaawo Geeldoox

The post Daawo: Qoyska Xasan Sheekh oo toos loogu eedeeyey dhul-boobkii maanta appeared first on Caasimada Online.