Daawo: Degmo ka tirsan GEDO oo qarka u saaran inay u gacan gasho Al-Shabaab

[Deeq A.]

Ceelwaaq (Caasimada Online) – Wararka naga soo gaaraya gobolka Gedo ayaa sheegaya in xaalado amni iyo culeysyo ay ka jiraan degmada Ceelwaaq ee gobolkaasi.

Guddoomiye ku xigeenka degmada Ceelwaaq, Mudane Bishaar Xasan Dhaqane ayaa sheegay in degmadan ay qarka u saaran tahay inay u gacan gasho kooxda Al-Shabaab, maadaama ay haatan ku sugan tahay agagaarka magaaladaasi.

Bishaar ayaa tilmaamay in muddo 11 sano ah ay ciidamo kooban oo ka tirsan daraawiishta Jubbaland ay joogaan degmada, laakiin markii hore ay daris la ahaayeen ciidamada Kenya ee ka tirsan howlgalka ATMIS, kuwaas oo dhowaan banneeyay saldhigga degaanka Giriley.

“Culeysyo waa iska jiraan nimanka Al-Shabaab ahaa dhulka waa joogaan marka haddii qaybtii ATMIS ee Giriley ka baxeen xoojin bey rabtaa degmada oo ciidan la keeno” ayuu yiri guddoomiye ku xigeenka maamulka degmada Ceelewaaq ee gobolka Gedo.

Sidoo kale wuxuu dalab culus u diray dowladda Soomaaliya, isaga oo ka codsay inay ciidamo federaal ah u dirto degmadaasi, si ay ula dagaalamaaan Al-Shabaab.

Guddoomiyaha ayaa xusay in Gedo ay la mid tahay gobollada kale ee loo diray ciidamada, sidaas oo kale ay u baahan yihiin in loo soo gurmado.

“Dowladda federaalka ciidamada ay kusii gureyso gobollo gaar ah oo waxaa weeye Galgaduud, Shabeelaha Hoose iyo Hiiraan, ciidamadu dalkoo dhan ayay ciidan u yihiin in la keeno degmada Ceelwaaq ciidan federaalka taas ayaan codsanay” ayuu sii raaciyay.

Hadalkan ayaa kusoo aadayo, ayada oo haatan uu isbeddal ka dhacay gobolka Gedo oo guud ahaan ay la wareegtay Jubbaland, waxaana meesha ka baxay khilaafkii gobolkaasi.

The post Daawo: Degmo ka tirsan GEDO oo qarka u saaran inay u gacan gasho Al-Shabaab appeared first on Caasimada Online.