Daawo: Ciidamada DF oo dilay xaaskii Muxudiin Saabey oo baxsad ka ah dowladda

[Deeq A.]

Muqdisho (Caasimada Online) – Askar ka tirsan ciidamada dowladda federaalka Soomaaliya ayaa magaalada Muqdisho ku dishay xaaskii Agaasime Muxudiin Xasan Saabeey oo baxsad ka ah dowladda, kadib markii lagu soo eedeeyey musuq maasuq.

Ehellada gabadha la dilay ayaa maanta warbaahinta la hadlay waxayna sheegeen in gabadha oo suuqa adeeg u soo doonatay ay dardareen laba Cabdibile oo ciidanka dowladda ah.

Intaas kadib waxay sheegeen inay isku dayeen inay raadiyaan taliska ay ka tirsan yihiin ciidanka dilay gabadha, balse ay taas ku guul-dareysteen, waxayna farriin u direen dowladda.

Odayaasha u hadlay ehelka gabadha ay dileen ciidamada waxay sheegeen inay dareemayaan in shaatiga dowladnimada lagu dul-minayo, iyadoo Saabey Muqdisho laga eryaday, hadana xaaskiisii la dilay, sida ay hadalka u dhigeen.

“Waxaan cabasho ka nahay dowladda, hadana ayada ayaan u cabaneynaa, dowladaan Alle ayaa nasiiyey aad ayaan u taageersanahay, shalay laba Cabdibile ayaa laamiga ku jiirtay gabar ilmo u heysay Muxudiin Xasan Jurus, waana ka dhaqaaqeen,” ayuu yiri mid ka mid ah odayaashii warbaahinta la hadlay.

Wuxuu sheegay in aagga ay gabadha ku dileen ciidankaas ay ku xiran yihiin Kaamirooyinka dowladda, balse ay waayeen cid uga jawaabta cabashadooda.

“Dowladdu gaadiidkii gabadha dilay ayadaa leh, anaguna waxaan nahay dadkeeda, dhib awal ayuu na heystay oo dowladdu waxay nooga dhegtay Muxudiin Xasan, hadana gabadhii ilmaha u heysay ayay dowladdu dishay,” ayuu odagaan hadalkiisa ku sii daray.

Waxay sheegeen inay yihiin qabiil dhan oo cabanaya, isla markaana ay dowladda ka codsanayaan in dib loo fiiriyo arrintooda, “Dowladda waxaan ka rabnaa inay dib u aragto hagarta shaatigeeda oo nalaku dilaayo,” ayuu hadalkiisa ku sii daray odaga u hadlay reerka.

Hoos ka daawo

The post Daawo: Ciidamada DF oo dilay xaaskii Muxudiin Saabey oo baxsad ka ah dowladda appeared first on Caasimada Online.