Daawo: Mas’uuliyiin xilal ka haya Muqdisho oo la ogaaday inay la shaqeeyaan Shabaab

[Deeq A.]

Muqdisho (Caasimada Online) – Guddoomiye ku xigeenka amniga iyo siyaasadda ee maamulka gobolka Banaadir Maxamed Axmed Diiriye (Yabooh) ayaa sheegay in masuuliyiin ka mid ah maamullada degmooyinka Muqdisho la ogaaday inay la shaqeyn jireen Al-Shabaab.

Guddoomiye Yabooh ayaa shaaciyey inay sax tahay xogta la maqlay ee sheegeysa in maamullada degmooyinka qaar xubno Shabaab ah laga dhex helay, isagoo digniin u diray qofkii si un ula shaqeeya ama hadda kadib cilaaqaad la yeela doona Al-Shabaab.

Sida ay ogaatay Caasimada Online, degmada maamulkeeda laga dhex helay Shabaab-ka waa  Hodan, waxaana hadda xiray ugu yaraan afar masuul oo lagu tuhmayo inay la shaqey jireen kooxda Al-Shabaab.

In kastoo Guddoomiye Yabooh uusan sii faahfaahin xogta xubnaha la qabtay, hadana wuxuu sheegay inay aad u aaminsan yihiin “In Shabaab aysan fuliyeen weerarro halis ah, hadii aysan xubno sare ka heleyn gacansiin.”

“Maamulka, hey’adaha ammaanka ama dadka kale ee galaangalka ku dhex leh dowladda waxaa ku jira xubno la shaqeeya Shabaab-ka, waxaas lama mooga, laakiin qof kasta maalin ayaa laga daba tegayaa, sida kuwa hadda aan idiin sheegayo ee lasoo qabtay,” ayuu yiri guddoomiye Yabooh.

Sidoo kale Yabooh ayaa sheegay in qofka masuulka ah ee Shabaabnimo lagu helo uu ka dembi badanayo qofka shacabka ah ee gacan-saar la yeesha Al-Shabaab.

Guddoomiye ku xigeenka dhinaca amniga iyo siyaasadda ee maamulka gobolka ayaa hadalkaan ka sheegay kulan ciwaankiisu ahaa ‘Wadatashiga qorshe howleedka maamullada degmooyinka gobolka Banaadir ee sanadkaan 2023-ka.’

Guddoomiye Yabooh ayaa digniin adag siiyey maamullada degmooyinka Muqdisho, isagoo yiri, “Masuul kastow ka fogaaw in raad Al-Shabaab uu ku soo galo, haba yaraatee Khawaarij inaad la shaqeyso ka fogaaw,” ayuu hadalkiisa ku sii daray Guddoomiye Maxamed Yabooh.

Dowladda Soomaaliya ayaa mudooyinkaan aad u baacsaneysa masuuliyiinta ku dhex jirta ee gacan-saarka la leh kooxda Al-Shabaab.

Saraakiil ciidan ayaa bilihii lasoo dhaafay loo toogtay inay la shaqey jireen Al-Shabaab oo fududeeyeen qaraxyo dad badan lagu laayey.

Hadda xubnaha la hayo ee laga qabtay degmada Hodan waxaa ku socda baaritaan, waxaana lagu wadaa in maxkamad lasoo taago.

Hoos ka daawo

 

The post Daawo: Mas’uuliyiin xilal ka haya Muqdisho oo la ogaaday inay la shaqeeyaan Shabaab appeared first on Caasimada Online.